Қарап тұрсаңыз, үйде отырған әйелдердің көпшілігі кейде уақытын зая кетіреді. Әрине, бала-шағасына қарайды, үй шаруасын істейді, одан қалса, сериал көреді. Бірақ осындай бірсарынды тірлік адамды жеп қояды, бірте-бірте өзіңнің қарайып, көп нәрседен мақұрым қалып бара жатқаныңды байқайсың. Міне, осындай жағдайда өзіңе де, отбасыңа да тиімді жолды таба білсең, ұтасың. Үйде отырып та кәсіппен шұғылдануға болады.
Өткенде теледидадардан бір жас келіншек сөйлеп жатыр, «Тамақ пісіріп, үй жинап, бала қарауға еркін үлгеретінімді түсіндім. Сөйтіп, бос уақытымда қолөнермен айналыса бастадым. Шашқа тағатын шеңберге әртүрлі тастар, жылтырақтар жапсыруды үйрендім. Ең бірінші өзіме жасадым. Құрбыларым көріп қызығып, «бізге де жасап берші» деп қолқалады. Бәрі содан басталды. Кейіннен «осындай бұйымдар жасап сатсам қайтеді» деген ой келді. Қазір бір жақсысы, өз бұйымдарыңды ғаламтор арқылы жарнамалауға болады. Мен де солай істедім. Енді міне, қосымша табыс тауып отырмын» дейді. Өзімнің де бір танысымның келіні баламен үйде отырып-ақ қыруар шаруа бітіріп жүр. Шаш та қияды, тырнақ та егейді, массаж да жасайды. Басында тек туған-туыс, жақын құрбыларына ғана жасайтын. Елдер бірінен-бірі естіп, құлақтана береді екен ғой, қазір өзінің әжептәуір клиенті бар. Болашақта сәбиін балабақшаға беріп, «сұлулық салонын ашсам» деп армандайды екен. Бас кезінде «Аш емес, жалаңаш емес, баласын бағып, үйіне қарап, тып-тыныш отырмай ма» деп келінін сөккен танысым енді «Ақшаның артықтығы жоқ екен ғой. Жақсы болды, кәдімгідей табыс тауып отыр» деп қуанып жүр.
Сол сияқты, ниет болса, кез келген кәсіптің көзін табуға болады. Сауда орталықтарындағы көздің жауын алатын торттар мен бәліштерді, тәтті тоқаштарды үйде де пісіруге болады. Әркім пісіріп те жүр. Тек аспаздықты арнайы кәсіпке айналдыруды екенің бірі құнттай бермейді. Ал біздің қазақтың қыз-келіншектерінің қолынан бәрі келеді. Бірақ өзінің өнерін ұштап, дамыту, іске асыру, игілікке жарату жағын ойлай бермейді. Жас адам деген не нәрсеге болсын ұмтылып, қызығып, құлшынып тұруы керек. Өйткені өмір сондай. Оның үстіне жұмыс орындары да қысқарып, көп адам далада қалып жатыр. Бұрынғыдай «өкімет өлтірмейді» деп қарап отыратын заман емес қазір. Сондықтан жастарға айтарым, қандай қабілетің бар, қолыңнан не келеді – көрсет. Бірдеңе істесең, жасасаң немесе жасағың келсе, бұрынғыдай «кімге сатам», «оны кім алады», «не істеймін» деп қарап отырма. Әлеуметтік желілер арқылы өз жарнамаңды жасап үйрен. Қысқасы, кәсібіңді жолға қоюға жаныңды сала кіріс.
Рабиға НҰРЛЫБЕКҚЫЗЫ,
зейнеткер,
Алматы қаласы.
http://zhasalash.kz/
