Шағын және орта бизнес саласында әйелдер тұрақты бизнеске қол жеткізді. Президент жанындағы Орталық коммуникациялар қызметінде өткен брифингте Парламент Мәжілісінің депутаты Айгүл Соловьева осылай деді.
– Шағын және орта бизнестегі әйелдердің үлесі 60 пайыздан асады. Әйелдер айналысатын бизнес түріне қызмет көрсету секторы, қонақүй, сауда салалары жататыны да белгілі. Алайда бизнес пен экономиканы «жыныс түріне», яғни «әйелдікі» немесе «ерлердікі» деп бөлуге келмейтін сияқты. Қазіргі уақытта шағын және орта бизнесте әйелдер тұрақты кәсіпке қол жеткізді. Бұл қарқын соңғы 5 жыл бойы жалғасып келеді», – деді халық қалаулысы.
Сөз арасында А.Соловьева бизнеске алғаш қадам жасаған кезінде гендерлік алалаушылыққа тап болғанын баяндап, былай деді: «Мен алғашқы қызметімді өтеп жүрген кезде әріптес ер адамдарға өз бизнес-жобамды көрсеткен болатынмын. Барлығымыз отырып, мәселені талқыладық. Талқылаудан кейін олар «жүріңдер, қалған мәселені темекі шеге қарастырайық» деді. Ал мен жалғыз қалып қойдым. Сол кезде мен әйелдерге бизнес салада қандай қиын екендігін алғаш сезіндім. Кейін жобамды жүзеге асыра бастадым. Аймақта сүт шаруашылығы кәсіпорындарының қауымдастығын құрдым. Сөйтіп, менің жобам қабылданып, бұл бәсекеде мен жеңдім».
Бұдан кейін депутат әйелдердің еңбекақысы ерлердің еңбекақысының 75 пайызын ғана құрайтынын атап көрсетті. «Бұл жерде тепе-теңдік жоқ. Сонымен қатар жасы келген әйелдерді жұмысқа қабылдамау ерлерге қарағанда жиі кездеседі» деді ол.
Осыдан соң билік өкілі бизнес мемлекетке арқа сүйеуді тоқтатуы тиіс екендігіне тоқталды. «Зерттеу көрсеткендей, кәсіпкерлердің 39 пайызға жуығы мемлекет оларға қаражат «сыйлауы» тиісті деп санайды. Мұндай көзқарастан, қате ұғымнан арылу керек. Өзге мемлекеттермен салыстырғанда, еліміздегі бизнес үшін жасалып жатқан жағдайлар мен қолдаулар әлдеқайда жоғары» деді А.Соловьева. Оның ойынша, бизнес жолындағы кедергілерді жою үшін бизнес-процедураларды қайта қарастыру қажет.
«Бизнестегі жағдайды одан әрі жақсартып, оның жолындағы кедергілердің көзін жою үшін, бәлкім, бизнес-процедураларға мұқият зерттеу жүргізу керек шығар. Мысалы, «Жергілікті мемлекеттік басқару және өзін-өзі басқару туралы заңды» алайық. 2015 жылы екінші кезеңі басталады. Осыны да ескеру қажет. Жалпы, әрбір жергілікті басқару органы тек бизнес қана олардың бюджеті үшін «сауылатын сиыр» екенін түсінулері керек» деді мәжілісмен.
Қанат МАХАМБЕТ, Астана
http://www.aikyn.kz/articles/view/44269
