[:kz]
Әкем зиялының нақ өзі. Мың пайызға. Мен оның балағат сөз айтқанын естіп көрмегенмін. Анама дауыс көтергенін естіп көрмеппін.
Белгілі продюсер Баян Мақсатқызы Ләйлә Сұлтанқызы жүргізетін «The Эфир» жобасының қонағы болды, — деп хабарлайды Tengrinews.kz.
Сұхбатында Баян Мақсатқызы продюсер мамандығының қиындықтары мен қыр-сырын, ұстаздарын, танымалдыққа оңай жету туралы әңгімеледі.
«Мен бұл мәселеге философиялық тұрғыдан қараймын. Мен мысалы 20 жыл бұрын туған болсам, қазір танымал болып отырар ма едім, қазір технологиялар басқа. Қазір сәл ғана ақылың, мәнерің, әртістігің болса, неге қарсы болуым керек? Бұл супер, күшті (…) Мысалы біздің кейбір блогерлер сияқты жасауға болады, төсіңді аштың, танымал бола кеттің. Қиын түгі де жоқ қой. Артыңды аштың, танымал болып шыға келдің. Ал мұны қоғамға пайдалы болатындай жасауға мүмкіндік бар. Мұның бәрі енді жастық шақтың мәселесі ғой, уақыт өте түсінесің», — дейді продюсер.
Сондай-ақ, ол қазір қоғамның айыптауға құмар екенін атап өтті.
«Неге екенін білмеймін, бәріміз әлдекімді талқылағанды жақсы көреміз, бастысы айыптауға құмармыз. «Күнәсіз болсаң, тас лақтыр» деп Христос (Иса пайғамбарды айтады — Авт.) айтты-ау деймін. «Біреуге ор қазба, өзің түсесің» деген сөз бар. Бірақ көбі бұл сөзді қабылдамайды. Осындай сіз жүргізетін бағдарламалардың болғаны жақсы, себебі ойыңды жеткізе аласың, бірінші кезекте өзіңе қара деп айта аласың», — дейді ол.
Әңгіме арасында Баян Мақсатқызы әке-шешесінің ұрысқанын ешқашан естімегенін айтты.
«Ешқашан. Қандай отбасыда өскенімді елестетесің бе? Әкем зиялының нақ өзі. Мың пайызға. Мен оның балағат сөз айтқанын естіп көрмегенмін. Анама дауыс көтергенін естіп көрмеппін. Жасым 45-те. Осындай отбасыда тәрбие көрдім», — дейді Мақсатқызы.
Продюсер қыздарының қазақтың салт-дәстүрлерін жақсы білетінін де әңгімеледі. «Білгенінше. Қазақтың оюларының бәрін атап береді деп айта алмаймын. Ондай деңгейге дейін емес, бірақ дәстүрлі дүниенің бәрін біледі. Бірақ оның адамдығын бұдан анықтай алмайсыз. Жаман адам бола жүріп те дәстүрді сақтауға болады. Әдемі болып көрінуге болады. Дәстүрлі білетін адамға құр ұқсағанша, игі іспен айналысқан дұрыс», — деп ойын жеткізді жоба қонағы.
Мұнан өзге, Баян Мақсатқызы елдегі кино өндірісі, құдайға сенуге қатысты, жасатқан көптеген операциясы, қазақстандық бірде-бір жаңалық порталына жазылмағаны және әлеуметтік мәселелермен айналысқысы келетіні жайлы әңгімелейді.
Айта кетейік, бұл жобаның мақсаты — танымал тұлғаларды жаңа қырынан көрсету, олар туралы жаңа мәліметтерді оқырманға ұсыну.
[:]
