[:kz]
Мен қай мемлекетте жүрмін? Осы сұрақты өзіме күнде сан мәрте қоямын.
Таяуда Алмалы аудандық халыққа әлеуметтік қызмет көрсету орталығында болғанда тіпті қаным қайнап кетті. Орталықта тек қазақтар жұмыс істейді және түгел қазақтілді екен. Қуанарлық жайт. Бірақ электронды кезекке беретін нөмірі жазылған бір жапырақ қағаздан бастап, маңызды құжат толтыру тек орыс тілінде жүргізіледі. Қазақ тіліндегі бір-екі сөз болса, міндетті түрде қате жіберу шарт. Орталықта орыстар өте сирек. Отыз қазаққа бір өзге ұлт шығар деймін. Бақылап отырдым.
Ендеше неге қағаз орыс тілінде толтырылады? Бұл не саясат? Заңды мемлекеттік тілің бола тұра оны қолданбау қандай пасықтық? Мен қай елдің азаматымын? Ресейдің бе, әлде Қазақстанның ба? Осыны қашан айырып алар екенмін?!
Құжатта бір «тұрғын» деген сөз төрт рет кездеседі, төртеуінде де қате бар. Бұл – пәтерге берілген паспорт. Маңызды құжат. Орталық құрылғанға дейін паспорт үстеліндегілер (бұрын осылай аталушы еді) менің туған жерімді қате жазып, мен оны түзетуін сұрағанда сотқа бар деген еді. Бүлдіретін кезде соттан рұқсат сұрамайды, жөндейтін кезде заңға бағына қалады. Әкемді әйел деп жазып қойған дүмшелерден бірдеңе талап ету мүмкін емес. Қазақшаны қате жазу заңмен қорғалатын секілді.
Қашан орыстың қолтығынан шығып, жеке-дара Егемен Қазақстан болар екенбіз? Қашан?!
Жұлдызай БАДАНОВА.
zamana.kz
[:]
