 Денсаулық сақтау министрлігі алғаш рет 30 науқасты шетелге трансплантация жасатуға жібермек ойда. Бүйректі алмастыруға мұқтаж 30 науқас емделудің бірінші кезеңі бойынша тексеруден өткізіліп, донор іздеу үшін Белоруссия мен Ресейге жіберіледі. Бірінші кезеңде олар донорды іздеуге қажет барлық тексеруден өтеді, донор табылған жағдайда, екінші кезеңде органды алмастырады.
Ал нақты донорды іздеуге орташа алғанда 6 айдан 2-3 жылға дейін уақыт кетеді, тиісінше органдарды трансплантациялау донордың табылуына қарай жасалады. Қазақстанда 2012 жылы 55 науқас шетелге емдеуге жіберілді. Жалпы, Денсаулық сақтау министрлігі шетелдерде емдеуге жіберілетін науқастардың санын азайту мақсатында нақты шаралар атқаруда. Отандық медицинаны дамытудың арқасында шетелге жіберіліп келген ауру түрлері қысқарды. Айталық, 2012 жылы шетелдерге жіберілуі тиіс 99 науқас отандық клиникаларда емделіп шықты. Олардың ішінде 50 бүйрек трансплантациясы, 1 жүрек трансплантациясы, ересектерге 22 кемік майы трансплантациясы, балаларға 8 кемік майы трансплантациясы бойынша жұмыс атқарылды. Сондай-ақ шетелдік мамандарды шақыра отырып, 12 балаға Қазақстанда күрделі операция жасалды. Егер бұрындары науқастар кардиохирургиялық операциялар жасату үшін шетелдерге жіберіліп келсе, бүгінгі таңда елімізде ашық жүрекке 1500-ден астам операция жасалды, оның 87-сі бірегей операция болып саналады. Бұл отандық медицинаның сапасы артқанын дәлелдейді. |
