Кез келген адамда фобия бар. Яғни, нақты бір нәрсеге қорқынышы байқалатындар. Біреулер жалғыздықтан қорқады. Мұны аутофобия деп атайды. Астрофобиядан зардап шегетіндер де бар.
Олар – күннің күркіреуінен, не болмаса найзағайдың жарқылынан зәре құты қалмайды. Енді бір топ ұшақпен ұшуды қаламайды. Ұшақтың ұшып қонғандағы сәті, турбуленттік аймаққа тап болғандағы кезеңі олар үшін бұдан асқан қорқыныш жоқ. Бұл дерт – аэрофобия деген атаумен белгілі.
Кеше бойында аталмыш фобиясы бар адамдарға «Эйр Астана» ұлттық әуетасымалдаушы компаниясы тренинг өткізді. Әлеуметтік желіде, интернет форумдарда осы мәселе мазалап жүрген жандарды компания өзінің Алматыдағы офисіне шақырып, әуе қызметкерлерінің қатысуымен түсіндіру жұмыстарын жүргізді. Техникалық қызметкерлер, ұшқыштар, борт серіктер аэрофобтарды мазалаған барлық сұрақтарға тұшымды жауап қайтарды. Келген қонақтарға ұшақ бортында кездесетін түрлі келеңсіздіктердің қалай алдын алатыны көрсетілді. Ұшу процесін даярлауда қандай мамандар қай міндетті атқаратыны, қосымша тексерістердің жүргізілуін және де әрбір әрекеттің құжатқа жазылып қол қоятыны айтылды. Қол қойған азамат заң алдында жолаушының қауіпсіздігіне түгелдей жауапты болады.
Ұлттық әуетасымалдаушы мұндай кездесулерді жыл сайын дәстүрлі түрде өткізіп тұрады.
Асқар БЕКОВ
http://www.aikyn.kz/
