Калалықтар пікірін ескере отырып жасалады
Кеше Алматы қаласының әкімі Бауыржан Байбектің жетекшілігімен «Алматы-2020» бағдарламасының жобасы бойынша жұмыс тобының отырысы болып өтті.
Отырыс барысында айтылғандай, бағдарламаның дайын жобасы жақын арада көпшіліктің – сарапшылардың, бизнесмендердің, үкіметтік емес ұйымдар мен қалалықтардың пікір-ұсыныстарын білу үшін қала әкімдігінің аlmaty.gov.kz ресми сайтында жарияланады. Бір ай ішінде ұсыныстар мен толықтыруларды арнайы құрылған almaty2020@a-a.kz электронды поштасына жіберуге болады. Осылайша, қаланың даму бағдарламасы елімізде алғаш рет көпшілік талқысына салынып отыр. Бұл Елбасының бес институттық реформасы мен Ұлт жоспары – «100 нақты қадамды» жүзеге асыру болып табылады.
Даму бағдарламасының жобасын жасауға мемлекеттік органдар өкілдерімен бірге қала құрылысы, сәулет, экономика және қалаларды стратегиялық жоспарлау салаларында үздік халықаралық тәжірибе жинақтаған, әлемге танымал «McKinsey&Company» компаниясы тартылды.
Мегаполистің даму бағдарламасын талқылауды және толықтыруды қамтамасыз ететін, құрамына ірі үкіметтік емес ұйымдардың, қаржы институттарының өкілдері, салалық қоғамдастықтар басшылары, қоғам қайраткерлері, түрлі сарапшылар енген қоғамдық кеңес құрылатындығы айтылды. Алдағы бір ай ішінде бағдарламаның салалық аспектілерін талқылау бойынша қалалық қоғамдастықтың ынталы топтарымен бірқатар диалог алаңдары ұйымдастырылады.
Көпшілік талқысына ұсынылып отырған «Алматы-2020» бағдарламасында одан әрі дамудың негізгі жеті бағыты тұжырымдалған. Олар: қолайлы қала, қауіпсіз қала, әлеуметтік бағыттағы қала, экономикалық тұрақты қала, бизнеспен жеке капитал қаласы, интеграцияланған қала, белсенді азаматтар қаласы. Бұлардың барлығы бағдарламаның бес қағидасына негізделген. Олар: әр адамға қамқорлық, озық тәжірибе негізінде тиімді және экономикалық шешімдер, экономиканың драйвері ретінде бизнесті ынталандыру, азаматтық қоғамды кеңінен тарту, жергілікті органдардың ашықтығы мен есеп беруі.
Алматы тұрғындары бір ай ішінде қаланың басты ресурсы адамдар мен олардың ақылы және шығармашылық қабілеті деп көрсетілген «Алматы-2020» даму бағдарламасын талқылауға белсенді түрде қатыса алады.
Шарафаддин ӘМІРОВ,
«Егемен Қазақстан».
АЛМАТЫ.
