 №15 гимназия – Алматы қаласындағы айтулы білім ордасының бірі. Аталған мектепте жыл сайын балалар үйі үшін «Қамқорлық» акциясы өткізіліп келеді.Оқушылар балалар үйіне жақсы, сапалы сақталған киімдер мен оқу құрал-жабдықтарын тарту етеді. Біздің басты мақсатымыз-бүлдіршіндердің жүрегіне жылылық сыйлау. Мұндай шараны дәстүрге айналдырған №15 мектеп оқушылары аталған ақцияға бар ынта-жігерімен кірісіп жүр. – Өкінішке қарай, Қазақстанда көптеген балалардың ата-аналары жоқ. Әрине, әке-шешесіз өмір сүру ауыр. Ал ата-ана бұл өмірдегі ең қымбат қазына, олар балаларын сүйеді, жақсы көреді, қателігіне қарамастан оларды аялап, әлпештеп өсіреді емес пе? Қазір Қазақстанда бала асырап алғысы келетін ата-аналар баршылық. Бұл – әрине, жақсы дәстүр. Қазақ ешуақытта жетімін жылатпаған. Сондықтан біз әрқашан ата-анасыз қалған құрдастарымызға көмектесуге тиіспіз, – дейді 7 «в» сынып оқушысы Әдина Махмұтова. Ал 7 «в» сынып оқушысы Айя Дүйсеева «мен ауруханада жатқанда әке-шешесі тастап кеткен 2 баланы көрдім. Қандай әдемі, қандай сүйкімді сәбилер. Оларды ата-аналары қалай тастап кеткен? Әрине, балалар үйіндегі сәбилердің әрқайсысының ауыр тағдыры бар. Бірақ мен олардың болашағына сенгім келеді. Балалар үйінен жақсы тәрбиеленіп шыққан оларды ересек өмір күтіп тұр. Мүмкін жақсы ата-аналар табылып, оларды өз баласындай асырап алатын шығар. Біз болашақтан үміт үзбеуіміз керек», – дейді. – Ең бастысы, өмір сүруге құлшыныс артуы қажет. Біз үшін әлемдегі ең басты құндылық – махаббат, мейірім қайырымдылық. Олардың тезірек есейіп, оқуға түсіп, өздері қайырымды ата-ана болуын тілеймін. Барлық адамға көмек керек, әсіресе, жанында тіреуі жоқ бүлдіршіндерге, – дейді 7 «б» сынып оқушысы Ә.Бадалова. Ал 7 «б» сынып оқушысы Айжан Манатқызы да өз замандастарына ешқауытта мұңаймауға кеңес береді. «Өйткені өмір –алда. Ал бүгінгі тіршілікте бәрі болады, ата-анасы тастап кеткенмен, ертең олар істеген әрекеттеріне өкініп қайта оралуы мүмкін», – дейді. Еркін Қалдан Айкын |
