Мемлекет басшысы Нұрсұлтан Назарбаев Мәдениет министрі Арыстанбек Мұхамедиұлымен кездесу өткізді. Бұл туралы Президенттің баспасөз қызметі хабарлады.
«Азаматтық қоғаммен ынтымақтасу, мемлекеттік тіл үйрететін аккредиттелген орталықтар желісін құруды жалғастыру қажет. Әлеуметтік тапсырыстар аясында барлық шығармашылық одақтармен, Қазақстан халқы ассамблеясымен, Дүниежүзі қазақтарының қауымдастығымен, «Болашақ» бағдарламасымен жұмысты жандандыру керек. Әлеуметтік маңызы бар әдебиеттерге келсек, халыққа қызықты, мазмұны сапалы шығармаларды шығаруға назар аудару қажет. Шығармалар елдің ішінде де, сыртында да біздің мәдениетіміздің рөлін арттыруға бағытталуы тиіс» деген Н.Назарбаевтың сөздері келтірілген Ақорда сайтында жарияланған хабарда.
Кездесу барысында Ұлттық мұражайды ашу мәселелері, «ЕХРО – 2017» халықаралық көрмесіне дайындықтың мәдени аспектілері, сондай-ақ министрліктің қызметінің басты бағыттары талқыланды.
Мемлекет басшысы республикада 8 мың жергілікті және 39 республикалық мәдениет мекемесі жұмыс істейтінін, олардың рөлі күннен-күнге ұлғайып келе жатқанын атап өтті. «Соңғы 10 жылда театрға келушілер саны – 50 пайызға, музейге келушілер – 25 пайызға, кітапханаға келушілер – 40 пайызға, концерт залдарына келушілер – 100 пайызға, кинотеатрға келушілер саны 400 пайызға көбейді. Мұның бәрі халықтың әл-ауқатының артқанын және мәдениетке, білімге деген ынтаның өскенін білдіреді. Осы саладағы кадрларды сапалы даярлау, қызметтің бірыңғай тәжірибелерін әзірлеу мәселесін қарастырған жөн. Әр облыста мемлекет қаржыландыратын 2 театрдан бар.
Бүгінде халық арасында олардың қандай жұмыс жүргізетініне, мәдени салмағы мен қызметінің сапасы қаншалықты екендігіне көбірек көңіл аударған жөн» деді Н.Назарбаев.
Өз кезегінде, А. Мұхамедиұлы Мемлекет басшысының Қазақстан халқына Жолдауында берілген тапсырмаларының іске асырылуы, соның ішінде Мәдени саясат және халықаралық жүйемен ықпалдастығының ұзақмерзімді тұжырымдамасының әзірлену барысы туралы баяндады.
Министр Тілдерді дамыту және олардың қызметі жөніндегі мемлекеттік бағдарламаның іске асырылуы туралы мәлімдеді. Мәдениет министрі ведомство алдына қойылған міндеттердің бірі қоғамымыздың рухани дамуы екенін атап өтті. Қазақстанда қазірдің өзінде шеберліктің биік деңгейін көрсетіп жүрген мәдени мекемелер бар. Осы орайда негізгі міндет – оларды халықаралық деңгейге шығару.
Кездесу қорытындысында Мемлекет басшысы қаралған мәселелер бойынша бірқатар нақты тапсырмалар берді.
Сондай-ақ, мемлекет басшысы Білім және ғылым министірі Аслан Сәрінжіповты қабылдады.
http://www.aikyn.kz/news/view/46426
