Биылғы еурокубок бәсекелері қазақ жанкүйерлерін әрі-сәрі күйге бөлеп тұр.Алғашқы іріктеу кезеңінен «Ақтөбенің» өте алмауы көңілді ғана емес, қоржынды да ортайтып кетті. «Ақтөбе» мен «Ордабасы» 4 кездесуде 1 ғана ұпай жинап, Қазақстан қоржынына 0,250 ұпай ғана салды.
«Ақтөбені» айналып өткен «Нымме Калью» ІІ іріктеу кезеңінің алғашқы матчында Лихтенштейннің «Вадуц» командасынан ұтылып қалды (1:3). Ал «Ордабасыны» жеңген «Бейтар» Бельгияда «Шарлеруаның» шаңын қапты – 1:5. Демек, ақтөбеліктер мен шымкенттіктер биыл өз дәрежелерінен әлдеқайда төмен өнер көрсетті деп кесіп айтуымызға болады.
«Астана» –шабуыл бар, нүкте жоқ
Өз тарихында тұңғыш рет Чемпиондар лигасының іріктеуіне қатысып жатқан «Астана» алғашқы матчта «Марибордан» жеңілді. Жеңіс голын 5-минутта орталық қорғаушы Шулер соқты. Сырт алаңда ойнаса да, астаналықтар қорғанысқа жамбастап жатып алған жоқ, керісінше, алаң иелерін тықсырумен болды. Бірақ ойлы шабуылдарды нәтижелі аяқтайтын бірде-бір мықты соққы жасай алмады. Ойын алдында жарақаттанған Кетевоаманың жоқтығы «Астанаға» ауыр тиді. Фокси 90 минут түгесілер тұста ғана алаңға шыққанмен, ойын тағдырын өзгертуге уақыты да, шамасы да жетпеді. «Марибор» де бас айналдырарлық ештеңе көрсеткен жоқ. Мәселе 22 шілде күні «Астана-Аренада» шешіледі. Станимир Стойлов өз командасын жеңіске бастай ала ма? Көңілдегі ой – осы.
ІІІ іріктеу кезеңінде «Астана» – «Марибор» жұбының жеңімпазы ХИК (Финляндия) – «Вентспилс» (Латвия) жұбының жеңімпазымен жолығатын болды. Алғашқы матчта ХИК 3:1 есебімен сырт алаңда жеңіске жетті. Демек, елордалықтар «Мариборды» ұтса, Суоми еліне жол тартуы мүмкін.
«Астанаға» қалайда жеңіс керек. Өйткені Қазақстан қоржынындағы ұпай мейлінше аз. 2013/2014 маусымында дәл осы «Астана» Еуропа лигасының І іріктеу кезеңінде «Ботевтен» (Болгария) екі матчта да ұтылып, Қазақстан еншісіне соқыр ұпай қоса алмап еді. Сол оқиға сабақ болса игі.
«Қайрат» рекордқа жақындады
Еуропа лигасының ІІ іріктеу кезеңінің алғашқы матчында «Қайрат» Алматыдағы Орталық стадионда Ереванның «Алашкерт» (Армения) командасын 3:0 есебімен ойсырата ұтты. Бауыржан Исламхан пенальтиден есеп ашса, Жерар Гоу мен Джордже Деспотович те мергендік танытты. Алматылықтар еурокубоктарда қатарынан үш рет жеңіске жеткен «Астана» мен «Шахтердің» табысын қайталады.
1. «Шахтер» – 2013/2014
Чемпиондар лигасына іріктеу
БАТЭ (Беларусь) – 1:0, 1:0, «Скендербеу» (Албания) – 3:0
2. «Астана» – 2014/2015
Еуропа лигасына іріктеу
«Пюник» (Армения) – 4:1, 2:0, «Хапоэль» (Израиль) – 3:0
3. «Қайрат» – 2015/2016
Еуропа лигасына іріктеу
«Црвена Звезда» (Сербия) – 2:0, 2:1, «Алашкерт» (Армения) – 3:0
23 шілдеде Ереванда өтетін ойында «Қайрат» жеңісті жолын жалғастырса, қазақ командаларының ішінде еурокубоктардағы ең ұзақ жеңіс сериясын меншіктейді. Демек, «Қайрат» осындай жетістік үшін де қарымта матчта жанын салуға тиіс.
«Алашкерт» қақпасынан саңылау тапқан Бауыржан Исламхан мен Жерар Гоу биылғы еурокубоктардағы голдар санын 2-ге жеткізіп, «Қайраттың» рекордшысы болып отыр. Бұған дейін В.Артемов, С.Сымақов, А.Фоменко, А.Богомолов, А.Тлехугов, А.Дарабаев, Й.Кнежевич сияқты футболшылар бір-бір гол авторлары атанған болатын. Биыл олардың қатарына И.Қуат пен Д.Деспотович те қосылды. «Қайрат» «Алашкертті» жолда қалдырса, ІІІ іріктеу кезеңінде Шотландияның «Абердин» командасымен кездеседі. Абердиндіктер Хорватияның «Риека» командасын сырт алаңда 3:0 есебімен ұтып, мәселені толықтай дерлік шешіп қойды. Бұған дейін қазақ клубтары Шотландия командаларымен тоқайласып көрген емес.
«Қайраттың» тағы бір рекордын айтпай кетуге болмайды. Үш ойында қатар жеңіске жетіп, В.Вайсс шәкірттері биыл әзірше Қазақстанның клубтық рейтингіне 0,750 ұпай қосып отыр. Бұған дейінгі алматылықтардың жоғары көрсеткіші былтырғы 0,5 ұпай болатын («Кукеси» – 1:0, 0:0, «Эсбьерг» – 1:1).
Былтырғы биіктен төмендемеу қажет
УЕФА коэффициентінде Қазақстан 30- орында тұр. Дегенмен алдымыздағы Әзірбайжанды қуып жету қиындау. Каспийдегі көршілеріміздің 4 командасының біреуі ғана еурокубоктардан шығып қалды. Биыл олар әзірше 1,125 ұпай жинап тұр (Қазақстандікі – 1,0). Әзірбайжанды қуып жету үшін «Қайрат» пен «Астана» кем дегенде ортақ қазынамызға 2-3 ұпай қосуға тиіс. Ал бұл – өте қиын шаруа. Әзірбайжанның соңғы 5 маусымдағы ұпай көрсеткіші – 11,625. Біздікі – 10,500. Демек, ара қашықтық алыстау.
Бізді өкшелеп келе жатқан Словакияның қарқыны да жаман емес. Бұл елдің 4 командасы да ат үстінде. Биыл олар таза 2 ұпай жинады. Қазақстанмен ара қашықтықты небәрі 0,250 ұпай бөліп тұр. (Словактарда 10,250 ұпай бар).
Ендеше, «Қайрат» пен «Астана» алдағы ойындарда, әсіресе, сырт алаңдарда да ұпай иеленуге тырысқаны жөн. Әйтпесе, төмендеп кетуіміз өте мүмкін.
Ғалым СҮЛЕЙМЕН
http://www.aikyn.kz/
