Қазақстан Республикасы Президентінің Мұрағаты Қазақстан Республикасы мәдениет және спорт министрлігінің Мұрағаттық іс және құжаттама департаментімен бірлесе отырып алғаш рет І Республикалық жас мұрағатшылар конкурсы ұйымдастырды.
Мемлекет қалыптасуының тарихи жолы Қазақстан халқының тағдырымен, ұлттық сана-сезімін қалыптастырумен тікелей байланысты. Өткенді білу, қазіргіні түсіну мен болашақты болжауға көмектеседі. Құнды құжаттарды ұқыпты сақтау – келер ұрпақ біздің уақыт туралы шынайы мәлімет алуының кепілі. Мұрағатшылардың игі, беріліп істеген еңбегінің арқасында өткен кезең есте сақталып, ұрпақтар сабақтастығы жалғасады. Өткізілген конкурс мұрағатшылардың кәсіби ортасында оңтайлы ахуалды қалыптастыруға, мұрағатшылардың кәсіби және іскерлік белсенділігін арттыруға, мұрағатшы мамандығы туралы оң қоғамдық көзқарас қалыптастыруға, мұрағат жұмысына жастарды тартуға, құжаттық мұраны сақтау және қолдану орталықтары ретінде мұрағаттардың беделін асыруға бағытталды.
– Жас мұрағатшылардың республикалық байқауы елімізде бірінші рет өткізіліп отыр. Конкурс жас мамандарды және олардың кәсіби өсуін қолдау, Қазақстан Республикасы Ұлттық мұрағат қорының құжаттарын танымал ету, елдің мұрағат мекемелерінің қызметін насихаттау, жас кадрлардың шығармашылық белсенділігін көтермелеу және мұрағатшы мамандығының беделін арттыру мақсатында ұйымдастырылды. Бұл шара Қазақстанның мұрағат ісін дамыту, ел тарихын зерттеу, өткенге құрметпен қарау бағытындағы тағы бір игілікті қадам болды. Сондай-ақ, оның байқауға қатысушылар үшін де маңызды ықпал болды, — дейді Қазақстан Республикасы Ұлттық мұрағатының бас сарапшысы, Жас мұрағатшылар кеңесінің төрайымы Гауһар Бекішева.
Конкурсқа Қазақстанның басқа қалалары мен облыстарының мұрағат мекемелері қатысты, солардың ішінде: Семей қаласының «Қазіргі заман тарихын құжаттандыру орталығы», Батыс Қазақстан облысының мемлекеттік мұрағаты, Жамбыл облысының мемлекеттік мұрағаты, Қызылорда облысының мәдениет, мұрағаттар және құжаттама басқармасы, Алматы қалалық мемлекеттік мұрағаты, Алматы облысының мемлекеттік мұрағаты, Қазақстан Республикасының Орталық мемлекеттік мұрағаты, Қазақстан Республикасы Президентінің Мұрағаты.
Конкурста жүлделі орындар мен түрлі номинациялар болды. Бірінші орынды Батыс Қазақстан облысы мемлекеттік мұрағатының «Ақжайық» командасы мен ҚР Президенті мұрағатының «Жас қыран» командасы бөлісті, екінші орынға Семей қаласы «Қазіргі заман тарихын құжаттандыру орталығы» «Мирас» командасы ие болды, үшінші орынды Алматы қалалық мемлекеттік мұрағатының «Мұрағатшылар – тынымсыз жүректер» командасы қанағат тұтты. «Ең белсенді топ» номинациясына Алматы облысының мемлекеттік мұрағатының «Мұрағат арулары» командасы, «Ең өнерлі топ» номинациясына Қазақстан Республикасы орталық мемлекеттік мұрағатының «Мұрағат жастары» командасы, «Ең тапқыр топ» номинациясына Жамбыл облысының мемлекеттік мұрағатының «Ежелгі Тараз» командасы, ал «Ең үздік танытылым» номинациясына Қызылорда облысының мәдениет, мұрағаттар және құжаттама басқармасының «Яксарт» командасы ие болды.
