Облыс орталығындағы Сұлтанмахмұт Торайғыров атындағы кітапханада КСРО халық сәулетшісі, «Құрмет» орденінің иегері, Халықаралық сәулет академиясының академигі, профессор Қалдыбай Монтақаевтың туғанына 65 жыл толуына орай еске алу кеші өтті. Енді университет студенттері сәулетшінің құрметіне ашылған шеберханада білім алады. Дәрісхананың ашылу салтанатында ректор Арын Өрсариев, сәулет және құрылыс факультетінің деканы Марат Күдерин, сәулетшінің жары Жібек Рамазанқызы, замандастары қатысты. Атақты сәулетші жайлы түсірілген деректі фильм көрсетілді.
Ректор сәулетші ғалымның жасап кеткен еңбектері бүгінгі ұрпақ үшін үлкен өнеге, мәңгі өшпес тарихи із қалдырғанын, Астанадағы Ақорданың дизайнін жасағанын, айтулы азамат облыс үшін, университет үшін мақтаныш екенін айтып, оның атына аудитория беру үлкен құрмет болып табылатынын атап өтті.
Қалдыбай Монтақаев – Алтай өлкесінде, Құлынды жерінде өмірге келген. Павлодар қаласындағы Ы.Алтынсарин атындағы гимназияның түлегі. Астана, Алматыда бой көтерген зәулім ғимараттардың көпшілігі Қалдыбай Монтақаевтың жобасы бойынша салынған. Ерекше үлгі-қиялмен тұрғызылған зәулім ғимараттар халқына қызмет етіп келеді. Елбасының Астана салу идеясын қолдап, ерекше үлес қосты. Астана Ақмолаға көшкенде, Қалдыбай Монтақаевтың жетекшілігімен авторлар тобы Ақмола бас жоспары тұжырымдамасына арналған республикалық конкурста жеңімпаз атанды. 1997 жылы Астананың жаңа орталығын дамытудың эскиз-идеяларын 27 елден қатынасқан халықаралық конкурсында «Ақ Орда» жобалау құрылыс компаниясының (Бас сәулетші Қ.Монтақаев) ұсынысы екінші орынды жеңіп алды. Оның Астанада Президент резиденциясы, Парламент, Сыртқы істер министрлігі, Республика даңғылы, Орталық алаң, Үкімет Үйі, Тәуелсіздік монументі, «Рахат-палас» бизнес орталығы, Алматыдағы Айнабұлақ, Алмагүл, Ақсай-4, Керемет тұрғын үйлер аудандарының жобасын жасап кетті.
Еске алу кешіне келген туыстары, дос-жарандары, ұстазы Ғазиза Әбжанова, курстас досы Дүйсен Мұстафин сәулетші жайлы естеліктер айтты.
– Есіл өзенінің жағалауындағы әсем ғимараттар Астанамызды көркейтіп тұр. Қалдыбайдың қолтаңбалары елорда жүрегінде, біздің көз алдымызда мәңгі қалады, – дейді жары Жібек Рамазанқызы.
Фарида БЫҚАЙ,
«Егемен Қазақстан».
ПАВЛОДАР.
