Соңғы жылдары елімізде тұрып жатқан түрлі ұлт өкілдерінің тарапынан қазақ тілін меңгеруге деген құлшыныс артып келеді. Солардың бірі павлодарлық Роман Лебедев қазақ тілін білуді өмірінің басты мақсаты деп санайды. Қазіргі қазақ тілін меңгеруі қуантарлық. Қажет десеңіз, мақалдап әңгіме айтып, таң қалдырады. Орыс ұлтының өкілі мемлекеттік тілді жетік меңгеруді Отан алдындағы азаматтық борышы деп біледі. Бір қызығы, ол қазақ тілін әдеттегідей оқытушы немесе тіл курстарының көмегіне жүгінбей, өзіндік әдіс-тәсілдерді қолданады екен. Бұл туралы таза қазақ тілінде өрбіген әңгімемізде айтып берді.
Роман Лебедев Павлодар мұнай-химия зауытында оператор болып қызмет етеді. Осыдан төрт жыл бұрын қазақ тілін меңгеруді мақсат еткен ол алғашқы кезде мемлекеттік тілді бір жылда оқып алуды межелепті. Бірақ, қазақ тілі – оңай дүние емес екенін және оның өте терең екенін түсінген ол тіл курстарының көмегіне жүгінбекші болды.
— Қазақ тілін оқыту курстарына барып, бір жыл ішінде меңгеріп шығамын деп ойлағанмын. Ойым бірден іске аспады. Себебі, қазақ тілін оқу қиынға соқты, қажырлы еңбек пен күш-қуатты, уақытты талап етеді. Оны мойымадым. Кейін тілді өз бетінше, үй жағдайында оқи бастадым. Нәтижем жаман емес, – дейді ол.
Р.Лебедев қазақ тілін меңгеруге бірқатар жағдайлардың түрткі болғанын жасырмайды. Талапты жас бастапқыда мемлекеттік қызмет саласында еңбек етуді көздеген. Осыған орай, қазақ тілін меңгеру қажеттілігі туындаған.
— Шыны керек, замандастарым сияқты менде мемлекеттік қызметте немесе саясат саласында жұмыс істегім келді. Алайда, ата-анам мен достарыммен ақылдаса отырып, техника саласына бет бұруды жөн санадым. Орта мектепті тәмамдаған соң, химия-механикалық колледжде білім алдым. Қазіргі кезде жоғары оқу орнында оқуымды жалғастырудамын. Алайда, қазақ тіліне деген құштарлығым мен сүйіспеншілігім өшпек емес. Өйткені, Қазақстанның әр азаматы мемлекеттік тілді білуге міндетті. Осы жерде еңбек етіп, жемісін көріп жатқандықтан қазақ халқының мәдениетін құрмет тұту – парыз. Тіл арқылы қазақ халқының салт-санасы мен ұлттық болмысын кеңірек таныдым, – дейді ол.
Роман тілді меңгеру үшін бірқатар әдіс-тәсілдерді қолданғанын жоғарыда атап өттік. Алғашқы сәтте А.Бектұров, Е.Романенко сынды ғалымдардың кітаптарын оқу арқылы «қазақшасын» дамытқан. Ауызекі сөйлеу стилін меңгерген соң қазақ тілінің грамматикасы, сөйлем құрылысын оқуға кіріскен. Қарап отырсақ, бұл – дәстүрлі тәсілдер. Романның айтуынша, тілді меңгеруге кітаптардан гөрі қазақ тілі ортаның тигізер пайдасы әлдеқайда көп. Қоғамдық көлікте отырған кезде қазақша сөйлейтін азаматтарға назар аударуға тырысамын. Бұл да – тәсіл. Тіпті, бір сөздің қазақша аудармасын білгім келсе, көшедегі адамдарды тоқтатып, сұраудан да арланбайды.
— Қазақ тілін оқу үшін ұялмау керек. Тілді үйренем деп талаптанған адам ниетіне жетеді. Негізі, қазақтың заңғар жазушысы М.Әуезовтың «Абай жолы» эпопеясын оқығым келеді. Арманым – осы! – деп сөзін тәмамдады Роман.
Сұхбаттасқан
Ақмарал ЕСІМХАНОВА,
Павлодар облысы
Сурет Munara kz сайтынан алынды
