Биік талғамды талап ететін театр тарландары тағы да – Қарағандыда. Дәлірек айтсақ, Қазақстан ұлттық театрларының ІІ Республикалық фестивалі бес күн бойы қарағандылықтарды өнеріне тәнті етпек. Фестивальдің мақсаты – еліміздегі мәдени және тілдік әр алуандықты сақтауға, мәдениеттердің өзара баюына, этносаралық келісімнің нығаюына және Қазақстан халқының мәдениетаралық диалогын дамыта түсуге ықпал ету.
Сарыарқа төсінде шымылдығын түрген фестивальға еліміздің әр түкпірінен келген театрлардың саны – алтау. Сонымен қатар жергілікті орыс драма театрларының әртістері де өз өнерлерін театрсүйер қауым назарына ұсынатын болады. Сонда жеті театр саф өнермен жұртты сусындатпақ. Бұл театрлардың қатарында С. Қожамқұлов атындағы Жезқазған қазақ музыкалық драма театры, Мемлекеттік корей музыкалық комедия театры, Республикалық неміс драма театры, Қ.Қожамияров атындағы Мемлекеттік ұйғыр музыкалық комедия театры, Оңтүстік Қазақстан облыстық өзбек драма театры және К.Станиславский атындағы Қарағанды орыс драма театры бар. Қойылымдардың барлығы дерлік ана тілімізде сөйлейді. Сондықтан да ұйымдастыру комитеті өкілдерінің айтуынша, бұл фестивальдің басты ерекшелігі театрлардың ізденісіне баға беруінде. Яғни театрлар байқауында басымдық ізденісте болмақ.
Кеңес Жұмабеков, Қарағанды қалалық С.Сейфуллин атындағы Қазақ драма театрының әртісі:
– Қазақстан ұлттық театрларының ІІ республикалық фестивалінде өнер көрсететін театр қойылымдарын бағалауда біз олардың ізденістеріне ерекше мән береміз. Театрға келгенде көрермен шатаспауы тиіс. Қойылымдарды бір-бірімен салыстыру емес, мұнда, ең бастысы – ұлттық театрлардың ізденісі басты мұрат.
Сонымен қатар бұл жолғы фестиваль тағы бір биік мақсат ұстаныпты. Ол – ұлттық театрлар арқылы халыққа сол ұлт авторларының шығармаларын таныстыру. Атап айтқанда, фестиваль аясында М.Әуезовтің «Қарагөз» қойылымын Мемлекеттік корей музыкалық комедия театры сомдаса, неміс драма театры Р.Қоңырбаевтың «Менің елім» спектаклін, өзбек драма театры Г.Шермуаммадтың «Жаназадағы тойын», ұйғыр театры М.Изимов, М.Ушуровтың «Ана мирасын» ұсынады. Баспасөз мәслихаты барысында ұйымдастырушылар фестиваль соңында «Үздік әйел образы», «Үздік ер адам образы» сынды аталымдар болуы мүмкін екендігін жеткізді. Бірақ оның анық-қанығы фестиваль соңында белгілі болады.
Гүлнафиз Мырзашева, Мәдениет және ақпарат министрлігінің кинематография және театр өнері басқармасының бас сарапшысы:
– Фестивальдың басты жаңалығының бірі – ұлттық авторлардың шығармаларымен көрермендерді таныстыру. Сол арқылы ұлтаралық этномәдени алуантүрлілікті, бірлікті сақтау, ынтымақ пен келісімді арттыру. Мәдениеттердің баюына, этносаралық ымыраның нығаюына және Қазақстан халқының мәдениетаралық диалогын дамыта түсуге ықпал ету.
Қазақстан ұлттық театрларының ІІ республикалық фестивалінің Қарағандыда өтуінің де өзіндік себебі бар екен. Ұйымдастыру алқасы Қарағандыны Қазақстан халқы Ассамблеясы таңдағанын айтады. Өйткені Қарағандыда театрсүйер қауым мол және де кеншілер мекені өнер мен мәдениеттің ошағы деген байламға келіпті. «Қанша айтқанмен Сарыарқа емес пе?» десті ұйымдастырушылар. Өнер сүйетін барша қала жұрты мен қонақтарына кіру – тегін. Жабылу салтанатында қазылар алқасы бұрын-соңды болмаған жүлденің иесі «Қазақ ұлттық драмасын үздік меңгерген әртісті» анықтайды.
Автор: Қызғалдақ АЙТЖАНОВА, Қарағанды
http://alashainasy.kz/culture/42903/
