ҚР Ішкі істер министрінің орынбасары Владимир Божко Оңтүстік Қазақстан облысына жұмыс сапарымен келді.
Сапар барысында Владимир Божко өңір басшысы Бейіт Атамқұловпен кездесті.
Кездесу барысында тараптар аймақтағы төтенше жағдайлардың алдын алу жұмысына қатысты мәселелерді талқылады. Сондай-ақ, әкімдік пен жергілікті төтенше қызмет көрсету арасында тығыз байланыс орнату қажеттігі айтылса, бұл байланыс әсіресе қыс мезгілінде аса маңызды екені сөз болды.
Оңтүстік Қазақстан облысына жасаған жұмыс сапары барысында вице-министр Владимир Божко өңірдегі жергілікті билік өкілдерімен кездесіп, төтенше жағдайлардың алдын алу жайы мен қыс мезгіліне дайындық барысын пысықтады.
Облыста өрт қауіпсіздігін қамтамасыз ету аясында 1685 нысанға тексеріс жүргізілді. Нәтижесінде 27 миллион 975 мың теңге айыппұл салынды. Төтенше жағдайлардың алдын алу мен оны болдырмаудың мақсатында департамент тарапынан көптеген насихаттық жұмыстар жүргізілді. Мәселен, 8 пресс-конференция мен брифингтер, 8 видеороликтер түсіріліп, жергілікті телеарналардан көрсетілді. Сонымен қатар, 40 мың плакат таратылып, 68 билборд көше бойларына ілінді.
Сондай-ақ, Владимир Божко облыс әкімінің бірінші орынбасары Дархан Сатыбалды мен Сарыағаш ауданының әкімі Бұхарбай Пармановқа «ҚР ІІМ Төтенше жағдайлар комитетіне 20 жыл» мерекелік медалін табыс етті.
Облысқа екі күндік сапарымен келген вице-министр Шымкенттегі «Достық» шағын ауданында орналасқан жаңа өрт сөндіру депосының ашылуына қатысып, Шардара суқоймасы мен «Көксарай» су реттегіші нысандарын аралау жоспарланып отыр.
ОҚО әкімінің баспасөз қызметі
