Нұрғиса ЕЛЕУБЕКОВ (фото)
Қайрат БАЙБОСЫНОВ, Қазақстанның Халық әртісі:
– Жаңа жыл мерекесін жыл сайын отбасында қарсы алуға тырысамын. Біз Жаңа жылды нағыз қазақтарша қарсы аламыз. Етімізді асып, дастарқанға қазы-қартамызды қойып, бала-шағамызбен Елбасының құттықтауын күтеміз. Елбасының құттықтауынан кейін туған-туыстарымызды құттықтаймыз. Біз үшін Жаңа жыл мейрамының ерекшелігі – осы. Жаңа жылдан кез келген азамат жаңаша тілек, жаңа үміт күтеді. «Ескі жылда орындалмаған армандар мен жоспарлар жаңа жылда орындалса екен» деп тілейтін қазақпыз ғой. Сондықтан да сіздердің басылымды пайдалана отырып, мен де барша қазақ баласына «Ескі жыл есіркесін, Жаңа жыл жарылқасын» дегім келеді. Әрдайым еліміз тыныш, түтініміз түзу шықсын. Өзіміздің дәстүрімізді, ділімізді, дінімізді насихаттай білейік. Кез келген халықаралық мерекенің өзіне қазақи бедер беруге болады. Сондықтан да Жаңа жылды нағыз қазақтарша қарсы алайық. Бұл мейрамның жетегінде көп кете бермей, өзіміздің төл мерекеміз – Наурызымызды дәріптеуге, сол мейрамның беделін арттыруға да күш салғанымыз абзал. Желтоқсандағы Жаңа жыл халықаралық мейрам болса, Наурыз – өзіміздің төл мерекеміз. Сондықтан қандай мейрамда болсын, қазақтығымыз биік тұрғай…
Темірхан МЕДЕТБЕК, ақын, Мемлекеттік сыйлықтың иегері, қоғам қайраткері:
– Менің төрт балам, сегіз немерем бар. Сол ұрпақтарымның барлығы Жаңа жылда үлкен шаңырақ деп біздің үйімізге келіп, мейрамды қарсы алады. Осылайша, Жаңа жылды тек өз отбасымда қарсы аламын. Жалпы, бұл мерекеге қатысты қайсыбір қауым «Жаңа жылдың не керегі бар» деп те жатады. Негізінде, бұл мейрамның халыққа зияны жоқ. Бұл мейрам әсіресе балалар үшін ерекше мереке болып қалыптасты. Қазір кез келген шаңырақтың бала-шағасы Жаңа жылды қуана қарсы алады. Әрине, «Жаңа жыл мейрамына дайындықты, қаланы безендіруді Тәуелсіздік мерекесінен кейін жасау керек» деген пікірлермен толық келісемін. Тәуелсіздік күнін жоғары деңгейге жеткізіп алғаннан кейін барып Жаңа жыл мерекесіне дайындық шараларын бастасақ оң болар еді. Сондықтан қалаларды безендіруді 16 желтоқсаннан кейін ғана қолға алуды жергілікті әкімдіктерге міндеттеу керек. Сонда ғана біз егемендігін қалтарыста қалдырмаған, еңсесін нық ұстаған ел атанамыз. Жалпы, биылғы жылқы жылы қазақтың басына келер ырыс молынан болсын. Әр қазақтың шаңырағынан шаттық-береке арылмасын.
Тұрсынбек ӨМІРЗАҚОВ, Мәжіліс депутаты:
– Әрине, өз отбасымда қарсы аламын. Қолымда үлкен шешем бар. Туған-туыстарым, бала-шағам – барлығымыз бір дастарқанның басында отырып, мерекеде бір-бірімізге жақсы-жақсы тілектер айтып, көңілді қарсы алуға тырысамыз. Әсіресе анамның тілегіне, бізге берер батасына барынша ден қойып, ол кісінің ұлағатты сөздерін үнемі құлағымызға құйып отырамыз. Ұрпақтарымыздың аман болуын, ел-жұртымыздың тыныш болуын әр жыл келген сайын тілеп отырамыз. Жалпы, бұл халықтық мейрамға ұласатын мерекеге болғандықтан, «әрбір қазақ баласының көңілін кірбің шалмасын» деп тілеймін. Елімізде дені сау бала мен дені сау ана көбейсін. Қазақ шаңырағы ешқашан шайқалмасын. Еліміз арман-мұратына жете берсін. Алдымызда әлі талай алар экономикалық-әлеуметтік асулар бар. Сол жолда береке-бірлігіміз нығайсын. Міне, сіздердің басылым арқылы халыққа осындай ақ жүректі тілектер жолдағым келеді.
Автор: Қарлығаш ЗАРЫҚҚАНҚЫЗЫ
http://alashainasy.kz/tar/48535/
