[:kz]
Қазақстаннан Түркияға әуе рейстері шектелуі мүмкін. Себебі аталған елде эпидахуал ушығып, пандемия басталғалы науқастардың рекордтық көрсеткіші тіркелуде. Түркияда вирустың «британдық» және «бразилиялық» штаммы жылдам таралып, аурудан көз жұмғандар соңғы аптада күрт артқан. Ел президенті Режеп Тайып Ердоған қасиетті Рамазан айында шектеу шарасын одан сайын күшейтті, деп хабарлайды Stan.kz ақпарат агенттігі «КТК» арнасына сілтеме жасап.
Түркияда жұқпалы дерт қайтадан дендеп барады. Өткен аптадан бері аталған мемлекетте күн сайын 50 мыңнан астам адамнан ауру анықталып жатыр. Бұл — пандемия басталғалы рекордтық көрсеткіш. Жергілікті билік наурыз айында қауіпті кесел кеулеген соң, коменданттық сағат енгізілген.
Анкарада білім алып жүрген отандасымыз қасиетті Рамазан айында шектеу шаралары тағы күшейтілгенін жеткізді. Мархабат Ілияс көшеде сақтық ережелерін қатаң сақтауға тырысатынын айтты. Себебі, бетпердесіз жүргендерді полиция әкімшілік жазаға тартады.
«Егер бетпердесіз жүрсек, 9 лира – 500 теңге айыппұл салынады. Түркияда коронавируспен күрес шаралары жалғасуда. Кешеден бастап кафе, мейрамхананың барлығы жабылды. Тапсырыспен ғана жұмыс істейді. Коменданттық сағат кешкі сағат тоғыздан таңғы сағат беске дейін. Апта соңында көшеге шығуға тыйым салынды. Апта соңында тек дүкен мен дәріханаға бара аламыз», — деді студент Мархабат Ілияс.
Түркияның денсаулық сақтау министрі 7 миллион адам коронавирусқа қарсы вакцинаның екі компонентін алып үлгергенін мәлімдеді. Фахреттин Кожа елде вирустың «британдық» және «бразилиялық» штаммы жылдам таралып, эпидахуал ушыққанын ескертті.
Қазір отандық туроператорлар Түркияға жолдама алған туристердің рейсін маусым айына ауыстыруға мәжбүр.
«Қазір турпакетпен Түркияда демалып жүрген 200 отандасымыз бар. Олардың денсаулығына алаңдайтын негіз жоқ. Себебі, Түркия туристерге барлық жағдай жасайды. Оған күмәніміз жоқ. Қазір алдын ала төлем алған туристердің демалысын келесі айға шегеріп жатырмыз. Түркиядағы эпидахуалды бақылаймыз. Бірақ ПТР-тест арқылы елге оралсақ, қазір бұл талап барлығына міндетті. Сол кезде бәрі дұрыс болады», — деді «Туристік қамқор» қорының төрайымы Инна Рей.
Ресей мемлекеті күні кеше ғана сәуірдің 15-інен маусымның 1-іне дейін Түркиямен әуе байланысын шектеді. Мәскеу мен Ыстамбұлдан аптасына тек 2 рейс жүзеге асырылады. Ауру асқынған Түркиямен әуе рейсін қысқарту мәселесі Қазақстанда да талқыланады.
«Түркиямен әуе қатынасты тоқтату немесе қысқарту бойынша мәселелердің шешімі тек қана ведомствоаралық комиссияның шешімімен шығады. Бүгін, ертең комиссия отырысы өтеді. Сол уақытта шешім шығады. Қазір Түркия және басқа елдермен әуе қатынасы тоқтатылған жоқ. Қазір әлемнің түкпір-түкпірінен туристер ағылатын Анкара, Ыстамбұл, Анталья қалаларында індет өршіп тұр», — деді санитария-эпидемиология бақылау комитетінің ресми өкілі Ержан Байтана.
Соңғы тәулікте Түркияда аурудан 243 адам ажал құшып, коронавирус құрбандарының жалпы саны 34 мыңнан асып жығылды. Жергілікті тұрғындар бүгін президент Режеп Тайып Ердоғанның қатысуымен өтетін үкіметтің отырысын асыға күтіп отыр. Өйткені дәл осы жиында қауіпсіздікке қосымша шектеу шарасы жариялануы бек мүмкін.
[:]
