[:kz]
Жоғары оқу орындарына мамандық ауқымын кеңейтуді ойластыру қажет. Бұл туралы Орталық коммуникациялар қызметінде «Мәдениет және өнер саласының кадрларын даярлауды жетілдіру» тақырыбында өткен баспасөз конференциясында «Астана Опера» Мемлекеттік опера және балет театры директорының орынбасары Төлеубек Әлпиев атап өтті.
«Қазіргі уақытта өнер саласында тікелей өзінің мамандықтары бойынша жұмыс таппай жүргендер көп. Мәселен, көптеген жастар оқу орындарда вокал өнері бойынша солист мамандығын меңгеріп шығып, бос орын жоқтығынан немесе жоғары бәсекелестік жағдайынан хор әртісі болып қызмет етуге мәжбүр. Сонымен қатар, елімізде концертмейстер мамандығы жетіспей жатады. Осы орайда өнер саласындағы жоғары оқу орындарына даярлайтын мамандық ауқымын кеңейтуді ойластыру қажет секілді», – дейді Т.Әлпиев.
Сондай-ақ ол кейбір әлемдік классикалық шығармаларды сахналағанда, отандық өнерпаздарымыздың шеберлігі жетіспеуінен шетелден әртіс алдыру қажеттілігі туындайтынын жеткізді.
«Өзіміздің «Біржан сал» операсын алатын болсақ, ондағы Біржанның партиясын жоғары кәсіби деңгейде орындап шығу үшін ерекше вокалдық қабілеті бар адам қажет. Ондай адамдар бізде санаулы. Одан бөлек, өзге де әлемдік классикалық шығармаларды қоған кезде қиын партияларды жоғары кәсіби деңгейде орындайтын солист таппай, шетелден адам алдыруымызға тура келіп жатады», – деді «Астана Опера» Мемлекеттік опера және балет театры директорының орынбасары.
Алтынорда
[:]
