[:kz]
Тимур Құлыбаев «Атамекен» ұлттық кәсіпкерлер палатасы президиумының төрағасы қызметінен кетті, деп хабарлайды KAZ.NUR.KZ тілшісі. Бұл туралы палата сайтында жарияланған Құлыбаевтың арнайы үндеуінен белгілі болды.
«Мен бүгіннен бастап «Атамекен» Ұлттық кәсіпкерлер палатасы төралқасының сайланған төрағасы өкілеттігін доғаруды ұйғардым. Съезд делегаттары мен төралқа мүшелеріне маған сенім білдіргені үшін алғыс айтамын. Ұлттық кәсіпкерлер палатасының жоғары бақылау органын сегіз жыл бойы басқару мен үшін үлкен құрмет пен жауапкершілік болды. «Атамекен» ұжымына оның ішінде қатардағы сарапшылардан бастап аудандық филиалдардың басшыларына дейін бірлескен нәтижелі жұмыс үшін айрықша ризашылығымды білдіремін. Біздің жұмысымыздың басты қорытындысы – бизнес пен биліктің жолға қойылған сындарлы диалогы, қолайлы бизнес-ахуалды қалыптастыру», — дейді ол.
Сонымен қатар, Тимур Құлыбаев үндеуінде «Атамекен» ұлттық кәсіпкерлер палатасының міндеті мен атқарған жұмыстары жайлы айтып өтті. «Біздің басымдығымыз әрқашан бизнес құқығын қорғау болды. Жұмыс — Жоғарғы Сотпен, Бас прокуратурамен және сыбайлас жемқорлыққа қарсы қызметпен жолға қойылған. Барлық өңірде кәсіпкерлердің құқығын қорғау жөніндегі кеңестер жұмыс істейді. 8 жыл ішінде ҰКП-ға 41 мың өтініш келіп түсті, олардың 40 пайызы шешімін тапты.
«Атамекен» ҰКП бастамасымен бизнес-ахуалды жақсарту бойынша жүйелі жұмыс жүргізілді. Заңнамалық түзетулердің 8 пакеті қабылданды. Экономикалық қылмыстарды декриминализациялау жүргізілді. Экономика саласындағы қылмыстық істерді тіркеу 5 есе қысқарды. Қылмыстық кодекстен «жалған кәсіпкерлік» бабы алып тасталды.
Рұқсаттар, хабарламалар мен лицензиялар саны 4 есе қысқарды. Бақылау-қадағалау жүйесіне реформа жүргізілді – 17 мың немесе 58% талап алып тасталды. 2021 жылдан бастап жаңа реттеуші саясатты – «таза парақтан» реттеуді енгізу басталды. 2024 жылға дейін барлық реттеу толық жаңа қағидаттармен қайта жазылады және цифрландырылады. Біз микронесиелеу механизмін байланыстырып, «Бастау» жобасын іске қостық.
Мыңдаған жұмыссыз және өзін-өзі жұмыспен қамтыған адамдар, әсіресе ауыл тұрғындары кәсібін бастауға мүмкіндік алды. Қазіргі кезде 180 мың адам оқып шықты. 60 мыңнан астам жоба іске қосылды, 70 мың жұмыс орны құрылды. Мектептер, колледждер мен жоғары оқу орындарында «Кәсіпкерлік және бизнес негіздері» пәні енгізілді. Бұл пәнді 250 мыңнан аса жасөспірім меңгеріп жатыр. Бұл – біз бірлесіп атқарған жұмыстың бір бөлігі ғана», — деген Құлыбаев алда жаңа үлкен міндеттер мен межелер тұрғанын айтты. «2022 жылғы 11 қаңтарда мемлекет басшысы өзінің үндеуінде «Атамекен» мен бизнес-қоғамдастық үшін басым бағыттарды белгіледі. Халық табысын арттыру бағдарламасын әзірлеп, импортқа тәуелділікті төмендету, мемлекеттік қолдау шараларының тиімділігін арттыру, экономикада мемлекеттің үлесін төмендету бойынша кешенді шараларді іске асыру қажет. Мемлекет басшысының осы тапсырмалары – ҰКП жұмысының басым бағыттары.
Біз жұмысымызда сайланған құрылымдардың кері байланысы мен олардың ұйым мүшелері алдында есеп беруіне қашанда назар аударып келдік. 2020 жылы тиісті өңірлердегі кәсіпкерлердің барлық өңірлік кеңесіне сайлау өткізілді. Аккредиттелген қауымдастықтар төралқаның салалық комитеттерін құрады және төрағаларын сайлайды.
Ашықтық, есептілік және тиімді кері байланыс енді цифрлық негізде «Атамекен» Ұлттық кәсіпкерлер палатасының бүкіл жүйесі жұмысының негізгі қағидаттары болатынына сенімдімін.
Сіздерге тағы да бірлескен жұмыс үшін ризашылығымды білдіремін және отандық кәсіпкерлікті дамыту жөніндегі міндеттерді орындауда алдағы уақытта да табыс тілеймін», — дейді Тимур Құлыбаев.
[:]
