[:kz]
Әуезов ауданы әкімі аппаратының қызметкерлері мен «Нұр Отан» партиясы аудандық филиалының мүшелері, аудан әкімінің атынан, ауданымыздың ең қарт тұрғыны Күлиман әжейдің үйіне барып, ел Тәуелсіздігінің 25 жылдығымен құттықтап, жылы лебізін білдірді.
Еңбек майданына қатысушы Күлиман Қырғызбаева 1917 жылы Алматы облысының Ақтерек ауылында дүниеге келген. Ата-анасы «халық жауы» атанып, ату жазасына кесілген. Әжейдің жұбайы Әжібек Қырғызбаев 1942 жылдың басында соғысқа аттанса да, Кенигсберг (Калининград) түбінде неміс-фашистердің қолына түсіп қалады. Содан 1947 жылы ақталып, елге оралғанымен, майдан салған жарадан 1966 жылы дүние салды.
Ауылда өгіз жегіп, жер жыртқан, орақпен шөп, бидай орған Күлиман апа қой да бақты, сиыр сауып, қора да тазалады. Бүгінде кейуана қыздарының, немере, шөбере-шөпшегінің рахатына бөленуде.
Ғасыр ғұмыр сүрсе де, апамыз теледидардан жаңалық қарап, «балаларға бөгет жасамайын» деп, құлағына құлаққап іліп, іPad-тан айтыс тыңдайтын көрінеді. Күлиман апа құр бос отыра алмайды. Ол үнемі бестемірімен шұлық тоқып, қолына тиген тоқыма өнімдерін сөгіп тастап, қайта тоқуға кіріседі. Үйі тоқыма жіпке толып жатыр. Ғасырға аяқ басқан Күлиман әжей құрмет көрсеткені үшін аудан әкімі мен партияға алғысын айтып, ақ батасын берді.
Сайрангүл КҮЛЕКЕНОВА.
http://almaty-akshamy.kz/
[:]
