[:kz]
Дональд Трамптың жақтастары Капитолийге, одан кейін Вашингтондағы Сенат залына баса көктеп кірді. Онда президенттік сайлаудың нәтижелерін бекітуге бағытталған кездесулер өтуі тиіс болған. Оқиға салдарынан жарақат алғандар бар, бір адам қайтыс болды. Алдымен америкалық басшының жақтастары Капитолийді қоршап алды, адамдар қабырғаларға өрмелеп, ғимараттың сыртқы балкондарына және оның кіреберісіне баса көктеп кірген деп жазады РИА Новости. Наразылықтарға байланысты Сенат пен Өкілдер палатасы кездесуді тоқтатты.
Конгресс кешеніндегі бірқатар кеңселер эвакуацияланды. Сенат мүшесі NBC News-ке АҚШ вице-президенті Майк Пенс Капитолийден қауіпсіз жерге жеткізілгенін хабарлады.
Өз кезегінде Трамп наразылық білдірушілерді бейбіт жолмен әрекет етіп, полицияға қолдау көрсетуге шақырды. АҚШ вице-президенті Майк Пенс те наразылық білдірушілерді Вашингтондағы Капитолий ғимаратының сыртында болып жатқан зорлық-зомбылықты тоқтатуға шақырды және оған қатысқандардың бәрі жауапкершілікке тартылатынын айтты.
Наразылық білдірушілердің АҚШ Конгрессінің ғимаратына баса көктеп кіруі — бұл Британияның 1814 жылы жасаған шабуылынан кейінгі Капитолийге жасалған алғашқы шабуыл деп хабарлайды CNN Капитолий тарихының маманына сілтеме жасап.
«Капитолийдегі тәртіпті қалпына келтіруге Колумбия округінің бүкіл ұлттық гвардиясы қатысуда», — дейді АҚШ қорғаныс министрінің міндетін атқарушы Кристофер Миллер. Көп ұзамай Сенат залы АҚШ-тың қазіргі президенті Дональд Трамптың жақтастарынан тазартылды. Тәртіпсіздіктер кезінде оқ атылғаны және жараланғандар бар екені белгілі болып отыр, бір әйел қаза тапты. Вашингтон полициясының өкілі Дастин Стернбек АҚШ Конгресінде наразылық акциясы кезінде жарақат алған әйел қайтыс болғанын растады. Бірнеше мемлекеттің Сыртқы істер министрлері мен халықаралық ұйымдардың өкілдері АҚШ-тағы наразылық акциялары кезіндегі зорлық-зомбылықты айыптады. Полиция Вашингтонда 13 наразылық білдірушіні қолға түсірді.
[:]
