Бүгін Оңтүстік Қазақстан облысының әкімі Бейбіт Атамқұлов қарттар күні мерекесіне орай ұйымдастырылған «Қарттарын қадірлеген ел ардақты» атты дөңгелек үстелде зиялы қауым мен бірқатар ҰОС ардагерлерімен кездесті. Жиында аймақ басшысы әлеуметтік мәселелерді көтерген ел ағаларымен еркін сұқбаттасып, пікір алмасты.− Оңтүстік Қазақстан облысының басшылығына келгеніме екі айға жуық уақыт болды. Қазіргі таңда аудандар мен қалаларды аралап, облыстың тыныс-тіршілігімен танысып жүрмін. Сіз болып, біз болып, өңірдің әлеуметтік-экономикалық дамуына үлес қоссақ, Елбасының сарабдал саясатының орындалғаны деп білем. Аға буын өкілдері — Сіздердің өмірлік тәжірибелеріңіз бен ақыл-кеңестеріңіз біз үшін маңызды. Алдағы уақытта бірлесе атқаратын міндеттер көп. Жаңа іс-шаралардың жоспарын бекітіп, жұмыс жасаудамыз, − деді облыс әкімі.
Әр салада еліміздің дамуына елеулі үлес қосып, аянбай еңбек еткен зиялы қауым өкілдері бүгінгі күннің өзекті мәселесі болған білім, денсаулық, мәдениет, әлеуметтік салалар төңірегіндегі ойларын ортаға салып, қоғамда кездесетін кейбір олқылықтардың шешу жолдарын ұсынды. Ақсақалдарды алаңдататын негізгі мәселе – қоғамдағы жастар тәрбиесі діни тұрақтылық. Ал ауыл шаруашылығы бойынша әлеуеті жоғары өңірдің бірқатар су арналарын жандандырса, жерінің үштен екісін суармалы жер құрайтын өңір елімізді жеміс-жидекпен қамтамасыз етуге қауқарлы болады. Ауыл шаруашылығы саласына бейім өңірдің осындай мүмкіндіктерін айтқан ел ағалары бізде агроном, мал дәрігері сынды мамандардың тапшы екенін, жалпы, өңірде кез келген сала бойынша маман тапшылығы бар екенін жеткізді.
Кездесуде өңір басшысы ұрпақтар сабақтастығын арттыру мақсатында Ардагерлер аллеясын ашу жайлы ұсынысын айтты. Қарттарға қамқорлық жасау – біздің міндетіміз деген Б.Атамқұлов ел ағаларына құрмет көрсетіп, сый-сияпат жасады.
Бүгінгі таңда облыста 210 мыңнан астам зейнеткерлер тұрады. Олардың ішінде 388-і Ұлы Отан соғысының ардагері болса, 22355 тыл еңбеккері. Жеңістің 70 жылдығына орай 23 майдангер тұрғын үймен қамтамасыз етіліп, 297 ардагердің баспанасы күрделі жөндеуден өтті.
Облыстағы ардагерлерімізге «Қамқорлық» акциясы шеңберінде қоғамдық көліктерде тегін жүруге, коммуналдық қызметтерге жеңілдіктер қолданылып келеді. Биылдың өзінде аталған акция шеңберінде 19,5 мыңға жуық ардагерге көмек көрсетілді. Қарттарымызды сауықтыру және денсаулығын бақылау мақсатында жыл сайын облыстық бюджет есебінен 8 мыңға жуық ардагер денсаулығын түзеуге мүмкіндік алады.
Сондай-ақ, 550-ге жуық 80 жастан асқан жалғызілікті қариялардың зейнетақыларына үстеме ақы төленеді.
ОҚО әкімінің баспасөз қызметі
