Ең қарт әжей төлебилік Фатима Хайранова 1 қаңтар күні 120 жасқа толды, ОҚО әкімінің баспасөз қызметі хабарлайды. Қарт ана Көксәйек кеңшарында көп жылдар бойы жұмысшы болып еңбек етіп, сол жерден зейнеткерлікке шыққан. Бүгінде 15 немере, 33 шөбере, 30 шөпшек және 3 немене сүйіп отырған кейуананың ойы анық, денсаулығы бірқалыпты. Осындай ұзақ ғұмыр кешіп отырған қарияларымыздың бірі 119 жастағы қарт кісі көршілес Тараз қаласында тұрады. Ал басқа аймақтардағы ұзақ өмір сүруші қариялардың ең үлкені 114-те екен. Айта кетейік, Оңтүстік Қазақстан облысында жасы 100-ден асқан 84 қарт кісі өмір сүреді. 2011-2015 жылдар аралығында «Саламатты Қазақстан» мемлекеттік бағдарламасының жүйелі жүзеге асырылуының нәтижесінде, облыста өмір сүру ұзақтығы соңғы бес жылдықта 69,5-тен 71,79-ға дейін өсті.
Источник: http://24.kz/kz/
