[:kz]
Қыстағы күн жарығының жетіспеуі мен температураның өзгеруі адам ағзасына, көңіл-күйіне тікелей әсер етеді. Адамда шаршау, әлсіздік пайда болады. Сондықтан осы кезде ағзаны қажетті витаминдермен толықтырып, нығайтқан дұрыс. Көктемгі күйзелісті жеңу үшін мамандар мынадай кеңестер береді:
Әлсіздік байқалып, көру қабілетіңіз нашарласа, А витаминін (сәбізде, қызанақта, көк бұршақта көп), жүйкеңіз жұқарып, шашыңыз түсіп, тырнақ сыну байқалса, В витаминін (пиязда, шпинатта, горохта мол), ағзаңызда зат алмасу процесі нашарлап, буындарыңыз сыр беріп жатса, С витаминін (картопта, орамжапырақта, салаттарда, бұрышта, редискада бар) пайдаланыңыз.
Жүрек шаншып ауырса, сары мейізді еттартқыштан өткізіп, балға араластырып, күніне 3 рет, 1 шай қасықтан жеңіз. Сары мейізді жиі жеу адам бойын сергітіп, жұмыс қабілетін арттырады. Оның 100 грамынан тәулікке қажетті С витамині табылады.
Күніне бір алма жеуді әдетке айналдырыңыз. Алма тәнге күш беріп, ағзаның әртүрлі аурулармен күресуіне көмектеседі.
Қант қызылшасы қанды көбейту, қақырықты босату, сіңірлерді бекемдеу, денені қуаттандыру үшін пайдалы. Адам ағзасындағы артық тұзды қуады.
Сәбіз тағамда витаминнің жетіспеуінен болатын ауруды жояды, ағзаның тұмауға қарсы қабілетін күшейтеді, зат алмасуын жақсартады.
Сондай-ақ көктемгі тамақ құрамында сүт өнімдерінің, қазы-қартаның, сүр еттің болғаны жақсы.
Ұйқыңыз тыныш болсын. Күніне 8 сағат ұйықтауыңыз керек. Мүмкіндігіңіз болып жатса, түс уақытында мызғып алу да артықтық етпейді.
Гардеробыңызда ашық түсті киімдер мен аксессуарлар көбірек болсын. Сарғыш түсті көйлек немесе орамал күйзеліспен тамаша күресе алады.
Өзіңізге ұнайтын эфир майы қосылған хош иісті ванна қабылдаңыз. Бұл көңіл-күйіңізді көтеріп, сергітеді.
Көбірек қимылдаңыз. Физикалық белсенділік мұндай сәттерде таптырмас көмек болмақ.
С. МАҚҰЛБЕК.
zamana.kz
[:]
