[:kz]
Сайлау күні жақындап келе жатыр. Десе де мұндай саяси науқанға «маған бәрібір» деп немқұрайлы қарайтындардың қатары аз емес. Тіпті, «менің даусым бәрібір ештеңені шешпейді» деп байкот жариялаушылар да жетерлік. Осы орайда ел алдында өз пікірлерін ашық айтып жүрген кейбір азаматтар көпшілікті мұндай маңызды дүниеге бейжай қарамауға шақырады. Олар бұл туралы әлеуметтік желідегі сұхбаттарында айтып та жатыр. Солардың бірқатарына тоқталып өтсек.
Марғұлан Сейсембай, қоғам қайраткері, кәсіпкер, инвестор: Адам белсенді болуы керек. Адам белсенділік танытып, өз құқығын қорғамаса, сенің құқыңды басқа біреу пайдаланып кетеді. Бұл – бір. Екіншіден, сайлауға барып бақылаушы болу керек. Өз басым сайлау учаскесінде таңертеңнен кешке дейін отырып, кімге қанша дауыс берілгенін өз көзіммен көргім келіп отыр. Бойкоттардың қанша болғанын да бюллетеньдер арқылы байқауға болады. Сайлауға қатысу керек, белсенділік танытып, бақылаушы болу керек. Бойкот жарияласаңыз да, бақылаушы болыңыз. «Бойкот жарияладым» деп диванда жату оңай. Қазақтың көбісінің бойкотты таңдау себебі де сол. Өз өзімен, өзінің ар-ұятымен «мен бойкотшымын» деп келісім-шартқа отыра салады. Сен солай диванда жатсаң, келешегімізге немқұрайлы қарағаның. Бойкот жасасаң, жаса, ол да бір позиция. Бірақ бар да, бақылаушы болып тіркел, дауыс бермесең де басқа біреудің дауыс беру үдерісін қадағала.
Бізге қазір көп әрі кішкентай жеңістер керек. Біз күнделікті жай ғана қарапайым нәрселерді шешуден бастауымыз қажет. Сонда билік пен радикалды оппозиция арасындағы наразылық төмендей бастайды, билікке деген сенім артады деген ойдамын.
Ринат Зайытов, айтыскер ақын: Бойкот деген – қорқақтың ісі. Мысалы, мен айтысқа шығып, «Айбек Қалиевті жеңіп кетемін, бірақ әділқазылар алқасы мені құлатып тастайды» деп айтысқа қатыспай қойсам, сол ерлік пе?! Мен ешкімге тілімді тигізгім келмейді. Бірақ қазір бірігетін, бір жеңнен қол, бір жағадан бас шығаратын уақыт. Мен бойкот жарияламаймын. Мен олай істей алмаймын. Сондықтан сіздерден өтінерім, сайлауға бейжай қарамаңыздаршы.
Егер біздің балаларымыз білімі жетіп тұрып, түсіп тұрған оқуын ақшасыз оқи алмайтын болса, егер қартайған кемпір-шалдарымыз бойынан әл-қуаты кеткенде тегін емделе алмайтын болса, жаңа туып жатқан балаларымызды шетелге сатпай, солардың балалар үйіндегі нанын ұрламай өсіре алмайтын болсақ, не жетістікке жеттік деп айта аламыз? «Басқаша өмір сүріп көрейін» дейтін адам болса, онда осы ойды қолдайды деп ойлаймын. Ешкімді ешнәрсеге үгіттемеймін. Мен тек өз пікірімді ғана айтып отырмын. Әркімнің өз таңдауы бар. Кімге дауыс берсеңіздер де өз құқыларыңыз.
Еркін Рақышев, кинорежиссер, сценарийші: 2011, 2015 жылғы Президенттік сайлауларға оппозиция өкілдері бойкот жариялап, өз талаптарын қойған еді. Ақыры не болды? Содан қандай жетістікке жетті? Президент 85-95 пайыз дауыс алды. Мен бойкот жариялап жүргендерден осыны үнемі сұраймын. Бірақ біреуі бір нәрсе айта алмайды. Бойкот жариялаушылар елді шатастырып жүр. Одан еш нәтиже болмайды. Тіпті сол бойкот жариялап, митингіге шығамыз деп жүргендердің көпшілігі сол күні үйінен де шықпайды. Мен соған бәс тігемін.
Сайлауға бойкот жариялаймыз дегендер үлкен мүмкіншілікті жіберіп алды. Енді мұндай мүмкіншіліктің қашан туатынын бір Құдай біледі.
…Ел азаматтары осылай дейді. Расында да ел болашағына бейқам қарамағанымыз дұрыс-ақ.
М. ӘМІР.
zamana.kz
[:]
