[:kz]
Түркістан облысынан Қарағанды өңіріне әскери борышын өтеуге барған сарбаз қаза болды. Небәрі 17 жаста қыршын кеткен Рамазан Жақыптың ата-анасы ұлдарының өліміне сене алар емес. Айтуларынша, марқұмның жағдайы екпе салғаннан кейін күрт нашарлап кеткен. Ал Абай ауданындағы Ұлтық ұланның әскери бөлімі сарбазға ешқандай екпе салдырмағандарын айтады.
Рамазан Жақыптың әскери киімі Қарағандыдан Түркістан облысына иесіз оралды. Былтыр желтоқсанда Құлатаевтар әулеті тұңғыш ұлдарын қуанышпен әскерге шығарып салған. Ал қазір бұрыштағы күртешені ғана құшақтап, егіліп отыр.
«Ол кәдімгі ауылда қара жұмыс істеп, мал қарап жүрген дені сау бала ғой, ешқашанда оның жүрегі ауырған емес. Дені сау бала ғой…», — деді марқұмның анасы Алтынай Құлатаева.
Алтынай Құлатаева осыдан он күн бұрын ұлымен сөйлескенде ұлы тамағының ісіп кеткенін айтқан. Онысын екпе салдырғаннан кейін қарауылға бірден шығып кеткені салдарынан болғанын айтқан.
«Қалайсың енді қазір деген едім, жағдайым жақсы деді. Неге жатпадың енді деген едім, жатқызбады деді. Температурамен барған ғой бірақ. Бірақ жатқызбады деді. Ойым сол, менің, қараусыз қалған да. Температурамен барса, ангинамен барса», — деді Алтынай Құлатаева.
Ал келесі күні, екінші ақпанда таңғы сегізде Рамазан әлсіреп тұрғанына шағымданған. Дәрігерлер оны Абай қаласының орталық ауруханасына жеткізген. Медициналық тексеру кезінде жағдайы күрт нашарлап, жансақтау бөліміне жатқызылған.
Бөлімшедегілер жауынгерге ешқандай екпе салмағандырын айтады. Ал сарбаз менингиттен қаза болды деп отыр.
«Таңғы сегізде басталды. Оның алдында түнде тұрып жатқаны көрініп тұр, камерамен қарағанда. Таңғы сегізде достары келіп айтты. Рамазанның жағдайы нашарлап жатыр қараңызшы деп. Одан кейін бірден біздің дәрігерлер сол ауруханаға апарды. Сағат 08:50-де ауруханада болды. Сағат 11:00 де қайтты деген хабар келді», — деді 6505 әскери бөлімшесі командирдің орынбасары Армман Сейітов.
Қазір 6505 әскери бөлімі карантиндік режимде жұмыс істейді. Марқұммен байланыста болғандар тексеріліп, ғимаратты толығымен залалсыздандырған. Айта кетсек, осыдан екі жыл бұрын дәл осы әскери бөлімде Талғардан келген сарбаз өзіне оқ атып, мерт болған еді.
Stan.kz ақпарат агенттігі.
[:]
