Аты аңызға айналған футболшы Қазақстан азаматтығынан бас тартты

Қазақстан футболына он жылдан астам уақытын арнаған «Астана» футбол клубының бұрынғы капитаны әрі қақпашысы Ненад Эрич Қазақстан азаматтығынан бас тартып, Сербия төлқұжатын қайта алғаны белгілі болды.

Бұл туралы журналист Ермұхамед Мәулен «Бірінші гол» YouTube арнасының шығарылымында айтты, деп хабарлайды altyn-orda.kz.

«“Астана” Эричке бірінші нөмірді мәңгілікке бекітіп берген еді. Бірақ жақында оның Белградқа көшіп, Қазақстан азаматтығынан бас тартқанын естідім», — деді Мәулен.

Эрич Қазақстан Премьер-лигасында 11 маусым ойнады. Ол өз жолын 2010 жылы алматылық «Қайрат» құрамында бастап, 32 матч өткізген. 2011 жылдан бастап «Астана» командасының негізгі қақпашысына айналды және бұл клуб сапында 318 матч өткізді. 2014 жылы Қазақстан азаматтығын алып, ұлттық құрамада 8 ойынға қатысты.

«Астанамен» келісімшарты аяқталған соң клуб оның Қазақстан футболына қосқан үлесін ескеріп, бірінші нөмірді мәңгілікке бекіту туралы шешім қабылдады.

«Бірінші нөмір ойын нөмірлерінің қатарынан алынып тасталады және ол мәңгілікке біздің капитанымыз Ненад Эричке тиесілі болады.

Ол клубтың символына айналып, алты чемпиондық титул, екі Қазақстан кубогы, төрт Суперкубок жеңіп алды және команданың еурокубокқа шығуында маңызды рөл атқарды», — делінген клубтың ресми мәлімдемесінде.

Клуб Эричпен қоштасып жатқанымен, бұл мәңгілік емес екенін атап өтті:

«Ол әрқашан ‘Астана Аренада’ қадірлі қонақ болмақ. Біз ‘қош бол’ емес, ‘көріскенше’ дейміз және алдағы өмірінде сәттілік тілейміз