Қазақстандағы ата-аналардың көбін балаға қай тілде білім беру керек деген сұрақ толғандырады. Өзі қазақ сыныбында оқыған блогер Мария Ахметова бұл шешімнің қандай артықшылықтары бар екенін айтып берді, деп хабарлайды Altyn-Orda.kz.
«Көптеген таныстарым менен жиі сұрайды: «Маша, мен баламды қазақ сыныбына бергім келеді, бірақ оған қиын болып кетеді деп қорқамын». Бірақ менің ойымша, бұл тамаша мүмкіндік— деп жазады блогер.
Екі тілді меңгерген — үлкен артықшылық
Мария Ахметованың негізгі дәлелі — екі тілді бірдей меңгеру мүмкіндігі.
«Маған қараңыз. Мен орыс тілін де, қазақ тілін де өте жақсы білемін, екі тілде еркін сөйлеймін. Үйде сіз орысша сөйлесесіз, ал мектепте бала қазақша оқиды және сөйлейді», — дейді ол.
Үй тапсырмасын орындау қиын болмай ма?
Кейбір ата-аналар өздері қазақ тілін білмесе, балаларына көмектесе алмаймыз деп алаңдайды. Алайда блогердің айтуынша, бұл бүгінде мәселе емес.
«Менің кезімде анам бір жолын тауып, маған көмектесетін. Ол кезде интернет те жоқ еді, тек кішкентай көк түсті сөздіктер ғана болды. Ал қазір кез келген ақпаратты интернеттен табуға болады, сондықтан бұл мәселе шешілетін нәрсе», — дейді Мария Ахметова.
Басқа тілдерді оңай меңгеру
Тағы бір маңызды артықшылық — қазақ тілін білу арқылы басқа түркі тілдерін үйрену жеңілдейді.
«Егер балаңыз қазақ тілін білсе, оған түрік, қырғыз, әзербайжан және басқа да түркі тілдерін түсіну оңай болады», — дейді блогер.
Мария Ахметова қазақ сыныбын таңдаудың тек тілдік дағдыларды дамыту ғана емес, сонымен қатар мәдени өрісті кеңейтудің маңызды қадамы екенін атап өтті.
