Қағазбастылық, көзбояушылық дегенді доғару қажет – Президент

Мемлекет басшысы Қазақстан алдағы уақытта жаңа экономикалық бағдармен дамитын болса үкімет және әкімдер жұмыс істеу тәсілін түбегейлі өзгертуі керек екенін айтты. Бұл туралы Stan.kz ақпарат агенттігі хабарлайды. 

“Ұлттық экономиканы өркендету үшін жаңа идеялар және ұзақ мерзімге арналған жүйелі ұстаным қажет. Біз еліміздің даму қарқынын күшейтуіміз керек. Экономиканы әртараптандырып, шетелден көбірек инвестиция тарту қажет. Үкіметтің басты міндеттерінің бірі – экономикалық қызмет субъектілерінің бәріне бірдей жағдай жасау. Экономикаға жаңа серпін беру үшін үкімет кәсіпкерлермен, инвесторлармен толыққанды серіктес ретінде тығыз байланыста жұмыс істеуі қажет”, – дейді Тоқаев.

Сонымен қатар ол шенеуніктерге қағазбастылық, көзбояушылық дегеннен арылу керек екенін ескертті.

“Мемлекеттік аппарат барынша тиімді және үйлесімді жұмыс істеуі керек. Қағазбастылық, көзбояушылық дегенді доғару қажет. Осындай жағымсыз үдерістердің кесірінен жұрттың реформаға және Әділетті Қазақстанға деген сенімі азаяды. Жоғарыдан тапсырма берілгенін, азаматтардан арыз түскенін немесе жағдайдың нашарлап кеткенін күтіп отырмау керек. Бастама көтеріп, дербес жұмыс істей білу қажет”, – деді президент.