Қазақстан әлем чемпионатында бокстан топ жарды

Қазақстан құрамасы Ливерпульде өткен бокстан әлем чемпионатында медальдар кестесінде бірінші орынға шығып, жеті алтын медаль еншіледі.

Қорытынды алтынды команда капитаны Айбек Оралбай (+90 кг) әкелді. Ол финалда Өзбекстаннан келген Жахонгир Зокировты жеңді, деп хабарлайды altyn-orda.kz.

Әлемнің екі дүркін чемпионы атанғандар – Алуа Балкибекова (51 кг дейін) мен Аида Әбікеева (65 кг дейін). Балкибекова түрік боксшысы Бусе Чакыроғлумен өткен жекпе-жекте үш раундтың бәрін өз пайдасына шешсе, Әбікеева алғашқы екі раундта ұтылып жатып, соңғы раундта кездесудің тағдырын өзгерте алды.

Жас спортшылар да мықты өнер көрсетті. Төрехан Сабырхан (70 кг дейін) жапондық Сэвон Окадзаваны тартысты кездесуде жеңсе, Наталья Богданова (70 кг дейін) австралиялық Лекеиша Перголитиді сенімді түрде ұтты. Сондай-ақ Санжар Ташкенбай (50 кг дейін) мен Махмуд Сабырхан (55 кг дейін) алтын медаль иегері атанды.

Жалпы алғанда, Қазақстан құрамасы турнирді он медальмен аяқтады: жеті алтын, екі қола және бір күміс. Президент Қасым-Жомарт Тоқаев спортшыларды құттықтап, алдағы АҚШ-та өтетін Олимпиадаға дайындыққа назар аудару қажеттігін атап өтті. Ливерпульдегі жеңіс Қазақстанның әлемдік әуесқой бокстың жетекші орталықтарының бірі екенін тағы да дәлелдеді.

altyn-orda.kz