Қазақстандықтар нумерологтардың кеңесі бойынша туған күнін өзгертуді бастады

Қазақстанда жаңа құбылыс пайда болды – адамдар нумерологтардың ұсынысы бойынша туған күнін өзгерте бастады. Бұл туралы баспагер Бақытжан Бұқарбай Facebook парақшасында хабарлады деп жазады Altyn-orda.kz

«Жуырда досымнан жаңа тренд туралы білдім: енді адамдар құжаттардағы туған күнін өзгерте бастапты. Нумерология және басқа да жалған ғылыми ілімдерді насихаттайтын ұстаздары оларға: ‘Егер туған күніңді өзгертсең, саған ақша мен табыс келеді’ деп сендірген көрінеді.

Мұндай нәрсеге рұқсат берілгені таңғаларлық. Екіншіден, бұл ақылға сыйымсыз. Ертең табысты болу үшін туған жерімізді де өзгерте бастаймыз ба? Еңбек ету керек, бос нәрсеге сенудің қажеті жоқ», – деп жазды Бақытжан Бұқарбай.

Қазақстанда туған күнді өзгертуге бола ма?

Қазақстандықтар туған күнін өзгерте ала ма деген сұрақ өзекті бола бастады. Tengrinews.kz тілшісі осы мәселе бойынша ҚР Әділет министрлігіне жүгінді.

Әділет министрлігінің тіркеу қызметі және заң қызметін ұйымдастыру комитетінің түсіндіруінше, туған күнді өзгертуге болады, бірақ бұл үшін маңызды себептер қажет.

«Неке (ерлі-зайыптылық) және отбасы туралы» кодекстің 187-бабына сәйкес, баланың туғанын мемлекеттік тіркеудің негізі – туу туралы медициналық анықтама немесе соттың туу фактісін анықтау туралы шешімінің көшірмесі болып табылады.

«Туған күн – бұл медициналық құжаттар негізінде белгіленетін нақты және даусыз факт. Оған өзгерістер енгізу тек ресми құжаттармен расталған объективті жағдайларда ғана рұқсат етіледі», – деп хабарлады министрлік.

Өзгерістер келесі жағдайларда мүмкін:

• Құжаттардағы қателік анықталғанда (мысалы, туған күн медициналық жазбалармен сәйкес келмесе);

• Бала асырап алу кезінде (туған күн соттың асырап алу туралы шешімінде көрсетіледі);

• Сот шешімі негізінде.

«Осылайша, туған күнді өзгерту тек жеткілікті негіз болғанда ғана мүмкін. Ол үшін азаматтар АХАТ бөліміне немесе ‘Азаматтарға арналған үкімет’ мемлекеттік корпорациясының (ХҚКО) филиалына жүгінуі қажет», – деп түсіндірді министрлік.

Азаматтық хал актілері жазбаларына өзгерістер енгізу бастапқы акт жазбасы мен жеткілікті дәлелдер болған жағдайда ғана мүмкін. Егер мүдделі тараптар арасында дау туындаса, мәселе сот тәртібімен немесе медиация арқылы шешіледі.