Қазақстанның батысындағы жанармай контрабандасы: ІІМ ондаған мың тоннаға жететін схеманы әшкереледі

Қазақстан ІІМ Ақтөбе облысында мұнай өнімдерін жымқыру және заңсыз экспорттау бойынша ірі схеманың жолы кесілгенін хабарлады. Полиция мәліметінше, бір топ адам мұнай өңдеудің бастапқы өнімдерін қолдан құжаттар арқылы тасымалдап, шетелге шығаруға арналған жүк көліктері мен теміржол вагондарынан тұратын желіні ұйымдастырған, деп жазады Altyn-orda.kz.

Екі өңірде жүргізілген операция барысында ұйымдастырушылардың нұсқауымен шамамен 60 тонна жанармай тасымалдаған жүргізушілер ұсталды. Күдіктілердің кеңселері мен үйлеріне жасалған тінтулер нәтижесінде 400 тоннаға жуық мұнай өнімі, атыс және газ қаруы, сондай-ақ заңсыз транзакцияларды растайтын бухгалтерлік құжаттар тәркіленді.

Сонымен қатар, алдын ала деректер бойынша, шетелге 30 мың тоннадан астам жанармайды шамамен 8 млрд теңгеге шығарған компанияның қызметі жеке тергеліп жатыр. Қазан айында шекара маңындағы теміржол станциясында көрші мемлекетке жөнелтілмек болған 300 тонна өнім тиелген төрт вагон ұсталған.

ІІМ қазір сотқа дейінгі тергеуді жүргізіп жатыр, тиісті сараптамалар тағайындалды. Ведомство мұндай схемаларды әшкерелеу басым бағыттардың бірі екенін атап өтті, алайда тергеу мүддесіне байланысты қосымша мәліметтер жарияланбай отыр.