Қазақстанның оңтүстігінде ашылатын орыс мектептерінде ресейлік мұғалімдер де сабақ беруі мүмкін

Қазақстанның оңтүстігіне орыс мектептерін ашу мәселесі пысықталып жатыр. Бұл туралы Оқу-ағарту вице-министрі Еділ Оспан айтты, деп хабарлайды «Адырна» тілшісі. 

«Мәселе зерттелуде. Бұл қазақстандық мектеп болғандықтан, жұмыс беруші де қазақстандық болады»,—деді ол Сенаттың жалпы отырысынан кейін.

Вице-министр оқушыларға ресейлік мұғалімдердің де сабақ беруі мүмкін екенін атап өтті.

«Ұстаздардың барлығы Ресейден болмайды. Тәжірибе алмасу мақсатында мектепаралық байланыс жүзеге асырыла жатар»,—деп сөзін толықтырды Еділ Оспан.

Еске салайық, бұған дейін Ресей Үкіметі төрағасының орынбасары Алексей Оверчук Қазақстанның оңтүстігінде үш орыстілді мектеп салынатынын мәлімдеген еді.