Қазақстанның шығысында мемлекетке 516 миллион теңгеге жер телімдері қайтарылды

Абай облысында прокуратура пайдаланылмаған 42 мың гектардан астам жерді мемлекет меншігіне қайтарды. Учаскелердің жалпы кадастрлық құны жарты миллиард теңгеден асады, деп хабарлайды Altyn-orda.kz өңірлік прокуратураға сілтеме жасап.

Қадағалау органының мәліметінше, тексеру барысында 104 жер учаскесі ұзақ уақыт бойы мақсатты түрде пайдаланылмағаны анықталған. Бұл – жер заңнамасын бұзу болып табылады.

«Прокуратура тиісті шаралар қабылдады. Барлық учаске мемлекеттік меншікке қайтарылды», – делінген ресми хабарламада.

Анықтама: Алматыдағы көп миллиардтық алаяқтық ісі

Бұған дейін Алматыда «Азаматтарға арналған үкімет» КЕАҚ-тың бұрынғы қызметкері мемлекеттік жер учаскелерін алаяқтық жолмен иемденіп, кейін оларды үшінші тұлғаларға 1,3 млрд теңгеге сатып жібергені үшін сотталған болатын.

Алайда бұл жерлердің нарықтық құны 13,6 млрд теңгеден асып кеткен.

Елдің әр өңірінде көлеңкелі схемалар мен жер заңнамасын бұзуға қарсы күрес аясында жер пайдалану саласында ауқымды тексерулер жалғасуда.

Altyn-orda.kz