Magnum-ға байкот: Қазақстандықтар курьердің қазақ тілін талап еткені үшін жұмыстан шығарылуына қарсы наразылық білдіруде

Әлеуметтік желілерде Magnum желісі курьерінің жұмыстан шығарылуы үлкен дау тудырып, Қазақстанда жаппай наразылыққа себеп болды. Қоғамның наразылығына курьердің клиентпен қазақ тілінде сөйлесуін сұрауы түрткі болды, осыдан кейін компания басшылығы оны жұмыстан босату туралы шешім қабылдады.

Оқиға туралы толық мәліметті Асылхан есімді қолданушы жазған. Ол Magnum арқылы азық-түлікке тапсырыс берген кезде курьер одан қазақ тілінде сөйлеуін өтінген. Асылхан бұл туралы жазбасын әлеуметтік желіде жариялағаннан кейін, компания қызметкерді жұмыстан шығарған. Бұл жағдай қоғамда үлкен талқыға түсті.

«Мен шағымданған жоқпын. Бірақ менің жазбамды оқыған соң курьерді жұмыстан шығарыпты. Енді ол жұмысқа қайта қабылданбайды», – деп жазды Асылхан.

Осыдан кейін Facebook желісінде қызу пікірталас басталды. Белсенді Руслан Түсіпбеков курьердің қазақ тілін талап еткені үшін жұмыстан шығарылуын азаматтық құқықтардың бұзылуы әрі мемлекеттік тілге деген құрметсіздік деп бағалады.

«Бір қазақ екінші қазаққа онымен қазақша сөйлеуді талап еткені үшін ренжіді. Соңғысын жұмыстан шығарды, ал біріншісі болған оқиғаға өкінетін сияқты. Ал Magnum-ның логистика директоры бұл мәселені осылай шешкеніне риза.

Міне, Тәуелсіздіктің 34-ші жылында Ұлы далада не болып жатыр. Осындай жағдай Ресейде болса ше? Курьер тұтынушыдан онымен орысша сөйлеуді сұрап, сосын оны жұмыстан шығарып жіберсе, қоғамда үлкен резонанс тудырар еді. Өйткені Ресейде ресми тіл – орыс тілі, және қызметкерлердің ресми тілде сөйлеуге құқығы бар. Ешбір елде мемлекеттік тілде сөйлесуді сұраған қызметкерді жұмыстан шығармайды. Ал бізде оп-оңай шығара салады! Мемлекеттік тілге деген осындай немқұрайлықпен бізді кім құрметтейді?» – деп ашынды белсенді.

Magnum өкілінің жауабы көп күттірмеді. Ол компанияның Қазақстан заңнамасы аясында жұмыс істейтінін, онда қазақ және орыс тілдерінің тең құқықты екенін атап өтті. Алайда, оның айтуынша, жұмыстан шығару шешімі қазақ тілін талап еткені үшін емес, курьердің  мінез-құлқына байланысты қабылданған.

«Біз адамдарды ұлтқа бөлмейміз және барлық тұтынушыларымызға бірдей қамқорлық көрсетеміз. Жұмыс барысында тұтынушыларды тәрбиелеуге, оларға мәдени немесе басқа дүниетанымдық талаптар қоюға тиісті емеспіз. Сондықтан біз қызметкерімізді тіл талабы үшін емес, тұтынушымен сөйлесу әдебі мен қызметтік өкілетін асыра пайдаланғаны үшін жұмыстан шығардық», – деді компания өкілі.

Оқиға қазақстандықтар арасында үлкен пікірталас туғызды. Көптеген адамдар Magnum-ды бойкоттауды бастап кетті. Олардың қатарында Шыңғыс Мұқан мен Дос Көшім сынды танымал тұлғалар да бар.