Шекара маңында жер сілкінісі: 4,6 магнитудалы жер сілкінісі тіркелді

16 шілде күні таңғы сағаттарда Қырғызстанда, Қазақстан шекарасына жақын жерде магнитудасы 4,6 болатын жер сілкінісі болды, деп хабарлайды Altyn-orda.kz.

Эпицентр Алматыдан шамамен 380 шақырым жерде, Тараз қаласына жақын маңда орналасқан. Алдын ала мәлімет бойынша, Қазақстан аумағында дүмпулер сезілмеген, алайда көршілес Қырғызстанда сейсмикалық белсенділік бірнеше елді мекенді қамтыды.

Жер сілкінісі туралы не белгілі?

Қазақстан Төтенше жағдайлар министрлігіне қарасты «Сейсмологиялық зерттеулер мен ақпараттың ұлттық ғылыми орталығы» ЖШС сейсмологтары жер сілкінісін астана уақытымен сағат 06:27-де тіркеген.

Магнитудасы — 4,6, энергетикалық класы — 9,9. Жер сілкінісінің ошағы Қырғызстандағы сейсмикалық белсенді аймақта, Калба мен Қара-Суу ауылдарының маңында болған.

Қырғызстан Ұлттық ғылымдар академиясының Сейсмология институтының мәліметінше, республика аумағындағы магнитудасы сәл төмен — 4,1, энергетикалық класы — 9,4. Ошақ Талас облысындағы халық тығыз қоныстанған аудандардан бірнеше шақырым жерде орналасқан.

Дүмпулер сезілген елді мекендер:

• MSK-64 шкаласы бойынша 3,5 балл: Калба, Атай Огонбаева, Қара-Суу, Көк-Қашат ауылдары

• 3 балл: Талас, Козучак, Жон-Арык, Қызыл-Туу, Ақ-Жар, Ақ-Сай, Чат-Базар, Сасық-Бұлақ

Қаза тапқандар немесе қираулар туралы ақпарат түскен жоқ.

Пікір:

Тянь-Шань аймағы тарихи тұрғыдан орташа сейсмикалық белсенділікке ие өңірге жатады. Бұл жолғы жер сілкінісі Қазақстанға тікелей залал келтірмегенімен, еліміздің оңтүстік облыстарында жүйелі мониторинг пен дайындықтың маңыздылығын тағы бір еске салды.

Altyn-orda.kz