Солтүстік Қазақстан облысына соңғы 9 жылда мыңнан астам қандас қоныстанды

Соңғы тоғыз жыл ішінде мыңнан астам этникалық қазақ тарихи отанына оралып, Солтүстік Қазақстан облысына тұрақты қоныс тепті. Олардың көбісі жаңа ортаға сәтті бейімделіп, жеке кәсібін де бастап кетті деп хабарлайды Altyn-orda.kz

Солардың бірі — Ираннан келген Наджиб Қазақ. Ол төрт жыл бұрын отбасымен Николаевка ауылына көшіп келіп, мемлекеттен 1,5 миллион теңге көлемінде грант алып, мал шаруашылығымен айналыса бастады. Бүгінде оның ірі қара саны 40 басқа жетіп, ауыл шаруашылығын белсенді дамытып отыр.

«Біз бұл жақтың климатына үйреніп қалдық. Алғашқыда таңертеңгі қар мен аяз таңқалдырса, кейіннен борандарды да өткердік. Қазір бәрі жақсы — жазда тіпті мал қорасын салып үлгердік. Маған мұнда өмір сүрген ұнайды», — дейді Наджиб.

Дүниежүзі қазақтарының қауымдастығы төрағасының бірінші орынбасары Заутбек Тұрысбеков атап өткендей, Қазақстан — шетелдегі отандастарды елге қайтару бағдарламасын жүзеге асырып жатқан санаулы елдердің бірі.

Тәуелсіздік жылдары ішінде елге 1,2 миллиондай этникалық қазақ оралды.

«Осы жерде дүниеге келетін балалар өзін оңтүстіктен келген деп емес, солтүстікқазақстандықпын деп санайтын болады. Міне, бұл — біздің ортақ мақсатымыз», — деді ол.

«Халық» қайырымдылық қорының басқарушы директоры Нариман Әбілшаиковтың айтуынша, көші-қон бағдарламасы солтүстік аймақтардағы кадр тапшылығын оңтүстік өңірлерден қоныс аударатын халық есебінен шешуге көмектесіп отыр. Бұл — мемлекеттік саясаттың бір бөлігі.

Қазіргі таңда Николаевка ауылына 35 отбасы көшіп келген. Мұнда мәдениет үйі, мектеп-интернат, медициналық пункт, диірмен, наубайхана және қонақүйлер сияқты қажетті инфрақұрылым бар — яғни жайлы өмір сүруге және еңбек етуге барлық жағдай жасалған.