Түркияда шамамен 650 адам тауық дөнерінен уланған .

Түркияның Коджаэли провинциясында 650-ге жуық адам тауық донерінен уланды, деп хабарлайды Altyn-orda.kz түрік БАҚ-қа сілтеме жасап.

Оқиға 3 сәуір күні Коджаэли қаласының Керфез ауданында болды. Адамдар дүкендердің бірінен сатып алынған донерді жегеннен кейін жүрек айнуы мен құсу белгілерімен ауруханаға түсе бастады.

Нәтижесінде жүздеген адамға медициналық көмек қажет болды. Олардың екеуі ауыр жағдайда қалған.

«Жалпы 648 адам улану белгілерімен ауруханаға жүгінді. Олардың 646-сы емделіп, үйлеріне жіберілді, ал екі адамның емделуі жалғасуда, өмірлеріне қауіп төніп тұрған жоқ», – деп мәлімдеді жергілікті билік.

Оқиғаға байланысты екі адам ұсталды. Полиция донер сатылған орынды жапты. Өңірлік ауыл шаруашылығы және орман шаруашылығы департаментінің мамандары өнімге сараптама жүргізіп, оның белгіленген стандарттарға сай еместігін анықтады.

Еске сала кетейік, бұған дейін Маңғыстау облысында 12 оқушының уланғаны хабарланып, бұл жағдайға байланысты Қазақстанның Денсаулық сақтау министрлігі тергеу жұмыстарын бастаған болатын.