Украинадағы Сумы қаласында трагедия: Ресейдің зымыран соққысы ондаған бейбіт тұрғынның өмірін қиды.

13 сәуір жексенбі күні таңертең Ресей әскері Украинадағы Сумы қаласына баллистикалық зымырандармен соққы жасады.

Бұл туралы жергілікті билік пен Украина президенті Владимир Зеленский X платформасындағы мәлімдемесінде хабарлады.

Ақпарат Altyn-orda.kz сайты арқылы «Еуропалық шындық» басылымына сілтеме жасай отырып таратылды.

Қала әкімінің міндетін атқарушы Артем Кобзарьдың айтуынша, шабуыл салдарынан 20 адам қаза тапқан.

Ал Украина Ішкі істер министрі Игорь Клименко бұл санды нақтылап, 21 адамның өмірі қиылғанын хабарлады. Жараланғандар саны — 83, олардың ішінде жеті бала бар.

Украина президенті Владимир Зеленский бұл шабуылды «ондаған бейбіт тұрғынның қаза тауып, жарақат алғаны» деп сипаттады.

«Сумы қаласына жасалған қорқынышты баллистикалық соққы. Жау зымырандары кәдімгі қала көшесіне, қарапайым тіршілікке — тұрғын үйлерге, білім беру мекемелеріне, көшедегі көліктерге соғылды… Бұл – адамдар шіркеуге баратын күнде, Иерусалимге Иеміздің кірген күнін атап өтетін қасиетті мереке күні болды», – деп жазды ол.

«Тек нағыз жауыз ғана осылай әрекет етеді. Қарапайым адамдардың өмірін қию – бұл нағыз қатыгездік. Қаза тапқандардың жақындарына қайғыра көңіл айтамын. Қазір құтқару операциясы жүріп жатыр. Барлық тиісті қызметтер жұмыс істеуде», – деп қосты Зеленский.

Сондай-ақ, ол халықаралық қауымдастықты бұл оқиғаға қатаң жауап беруге шақырды.

«Ресей осындай террорды қалайды және соғысты әдейі созып отыр.

Агрессорға қысым жасалмайынша, бейбіт өмір мүмкін емес.   Баллистикалық зымырандарды не әуе бомбаларын тоқтатқан емес. Ресей террористке лайықты қарым-қатынасқа лайық», – деп атап өтті Украина президенті.

Оқиға орнынан түсірілген фото және видео материалдарда бірнеше ғимараттың қирағаны, терезелердің сынғаны және ғимараттардың қасбеттері бүлінгені көрінеді.

Көшелерде – жанып кеткен көліктер, қаза тапқандардың денелері мен зақымданған қоғамдық көлік бар.