Жас патриоттар Ұлттық музейде экскурсия жасады

Қазақстан Республикасының конституция күніне орай Астана қаласы әкімдігінің Жастар саясаты мәселелері басқармасының қолдауымен, «Жас Сарбаз» жасөспірімдер әскери-патриоттық қозғалысы» республикалық қоғамдық бірлестігі Астана қалалық филиалының ұйымдастыруымен ҚР Ұлттық музейінде жас патриоттарға арнап экскурсия өткізілді.
Іс шараның мақсаты – жас ұрпақ арасында қазақстандық патриотизмді, мемлекетке деген құрмет пен сүйіспеншілікті қалыптастыру, Конституцияның маңызын түсіндіру, ел тәуелсіздігі мен ұлттық бірліктің құндылығын дәріптеу.

Сонымен қатар, өскелең жастардың құқықтық мәдениетін арттыруға, азаматтық жауапкершілігін нығайтуға және тарихи-мәдени мұраға деген қызығушылығын дамытуға бағытталған.
Экскурсияға 25 «Жас Сарбаз» тәрбиеленушілері қатысты.

Атап өту керек, Астана қаласында қазіргі таңда 10 мыңға жуық жас сарбаз тәрбиеленушілері бар.
– Бүгін қатысушыларға ҚР Конституциясының шығу тарихын таныстырып, оның маңыздылығын атап өтіп жатырмыз. Бауыржан Момышұлы атамыздың:

«Тәртіпке бағынған құл болмайды тәртіпсіз ел болмайды» деген керемет сөзі бар.

Әрбір мемлекеттің тұрақты тұрақты әрі дәйекті дамуы үшін мемлекеттің Ата заңы, тәртібі болуы керек. Сол себепті бүгінгі өтіп жатқан іс-шараның мән-маңызы орасан зор деп атап өткім келеді. Біз мұнымен ғана шектелмейміз, Ата заңымыз – Конституцияның әзірленуіне атсалысқан арнайы тұлғалар, азаматтар мен азаматшалар бар.

Сол кісілермен байланысқа шығып, солардың қатысуымен арнайы «Жас сарбаз» тәрбиеленушілеріне адам құқығы бойынша сабақтар өткізу және оның тарихына тереңінен үңілу мақсатында арнайы іс-шаралар өтетін болады.

Мемлекет басшысы айтып өткендей, Ата заң – ол мемлекетіміздің берік тұғыры, еліміздің тұрақты әрі дәйекті даму кепілі. Сондай-ақ, елтаңбамыз, рәміздер күні де іс-шаралар, одан бөлек, ұлттық әскери-патриоттық орталықтарда арнайы ашық есік күндері өтеді.

Жастарымыздың бойында ұлттық тәрбиені, ұлттық рухты, патриоттық сезімді қалыптастырамыз. Жастардың тарихқа зер салуына мән береміз. Себебі тарихты білмесе, болашаққа қол соза алмаймыз.

Сондықтан біздің алғашқы іс-шарамыз ұлттық музейден басталып отыр. Бізде арнайы кесте бар. Астана қаласында орналасқан Ұлттық музей, Ұлттық әскери-патриоттық орталық, Елбасы атындағы кітапхана, АЛЖИР бар, жалпы, Астана қаласындағы тарихи орындар жеткілікті. Ашық есік күндерін ұйымдастыру мақсатында әрбір мектепке біз арнайы кесте құрамыз, жастар түске дейін немесе түстен кейін сабақтан тыс бос уақытында сол жерлерге келіп, өздеріне керекті ақпараттарды алатын болады, – дейді Жас Сарбаз» жасөспірімдер әскери-патриоттық қозғалысы Астана қалалық филиалының төрағасы Налшыбек Асхат Бағдатұлы.

Нұрсұлу Мырзахмет