Астана қаласында келген адамдарға дәрі беріп, дуалаған «Благодать» діни бірлестігінің пасторы Бақытжан Қашқымбаев қамауға алынды» деп хабарлады Астана қалалық ішкі істер департаментінен София Қылышбекова. Діни ұйымның пасторы Б.Қашқымбаевтың қылмыстық әрекеттеріне қатысты қылмыстық іс былтыр күзде, қараша айында қозғалған екен, алайда қамауға енді алынды.
«Астаналық «Благодать» қайырымдылық миссиясы» діни бірлестігі құқық қорғау органдарының назарына баяғыда ілінген. Бұдан екі жыл бұрын осы діни
ұйымның негізін қалаушы, миссияның рухани жетекшісі Корея азаматы Ким Сам Сон Алматы әуежайында ұсталған болатын. «Благодать» миссиясын ұйымдастырушы 130 мың долларды елден заңсыз алып кетпекші болған. Ол кеденшілерге бұл ақшаны шіркеулеріне келетін жомарт адамдардың садақасы деп түсіндірген.
Астана қалалық ішкі істер департаментінің мәліметтеріне қарағанда, «Благодать» шіркеуіне барып, құдайға сыйынып жүретін 34 жастағы астаналық бір келіншек кезекті жиыннан кейін есінен ауысып, психиатриялық ауруханадан бір-ақ шыққан. Оған дәрігерлер «жоғары деңгейдегі суицидалдық қауіпті параноидалдық шизофрения» деген диагноз қойған. Тексеру барысында «Астаналық «Благодать» қайырымдылық миссиясы» діни бірлестігінің пасторы Б.Қашқымбаев құдайға сыйыну кезінде шіркеуге келушілерге қызыл түсті ішімдік беретіндігі анықталған.
– Шіркеудегі ішімдіктің құрамын анықтау үшін тергеушілер оны сарапшыларға тапсырып, Дәрі-дәрмек құралдарын зерттеу орталығының қорытындысын алды. Шіркеуге келушілерге берілетін қызыл түсті ішімдік фенол тобына жататын зат, сондай-ақ оның құрамында эйфория шақырып, адамды босаңсытатын галлюциногендік ингредиенттер бар екендігі анықталды. «Астаналық «Благодать» қайырымдылық миссиясы» діни бірлестігінің ғимаратын тексеру барысында осындай ішімдіктің үлгілері, діни араздықтар тудыратын, жауластыратын белгілері бар әдебиеттерге ұқсайтын кітаптар табылды. Сонымен қатар «Үміт-Надежда» баспаханасынан шыққан басылым өнімдері табылды, бұл кітаптар Дін жөніндегі агенттіктің тиісті рұқсатынсыз басылған. Бұл заттарға қазір психолого-филологиялық және діни экспертиза жасалып жатыр. Осы фактілер бойынша «Астаналық «Благодать» қайырымдылық миссиясы» діни бірлестігінің пасторы Бақытжан Қашқымбаевқа қатысты ҚР Қылмыстық кодексінің 103-бабы бойынша қылмыстық іс қозғалды, – дейді Астана ішкі істер департаментіндегі баспасөз қызметінің жетекшісі София Қылышбекова.
Соңғы жылдарда республика аумағында белсенді жұмыс істеп жатқан, өздерін «құдай куәгерлері» деп атайтын корей протестанттарының саны қазақтармен толығуда. Қазірдің өзінде қазақтардан құралған бірнеше христиандық бірлестіктер бар. Олардың бірқатары заң жүзінде тіркелгенмен, уағыздарын қалың мұсылмандардың арасында ешқандай қымсынбастан, ашық таратады. Кейбір секталар психотропты дәрілерді пайдаланады. Қарағандыдағы «Грейс» деген христиандық миссионерлік шіркеуінен адамның психикасына қатты әсер ететін препараттар табылған болатын. «Грейс» шіркеуі өз діндерінің басқа діннен артықшылығын уағыздап, діндер арасына алакөздік тудыратын уағыздар таратқан. Психотропты дәрілерді шіркеуге келушілердің мүліктерін алу үшін пайдаланған.
Қайыржан ТӨРЕЖАН
Айкын газетiнен алынды
