АЛТЫНОРДА
Новости

«АУЫЛ САҚШЫСЫ» БОЯМАСЫЗ БАЛЛАДА

«Қазақстан» ұлттық телеарнасында көрсетілген кезекті 16 сериалды көркем фильмнен кейін туған ой. Әңгіме – «Ауыл сақшысы» сериалы хақында болып тұр. Оның премьерасы таяуда ғана «Қазақстан» ұлттық теле­арнасынан көрсетілді.

Барлығы 16 сериядан жұптасқан жобаны көкейтесті мәселенің үгін ар­қалаған қазіргі қазақ сериалдарының қатарына батыл түрде кіргізуге болады. Сериал – бірегей. Оның бірегейлігі сонда, фильмдер жинағы – үлкен бір қа­зақ аулының Шаңырағында тұрып жатқан, қазіргі заманның шақыруына бір кісідей үндесуге дайын халықтың бар болмысын көрсетуге бағытталған. Әзіл-оспақтан да кенде емес, әрі ауыл деп соққан үлкен жүректің жылуы ешбір боямасыз көрі­ніспен, шынайы сезім арқылы баянда­лады. Сюжеттің негізіне – «Біздікі – бө­тендікі» немесе «сенікі – менікі» деген баршамызға бағзы за­маннан таныс классикалық желі алын­ған. Ет пен сүйегі қалалық болып қалып­тасқан уыздай жас полиция лейте­нанты қызмет бабы ар­қы­лы кездейсоқ тап­сыр­мамен ол үшін ашыл­маған аралдай кө­рінген ауыл өмірі­нің үстінен түседі. Ауылдың – не, ата дәстүрдің қандай бола­ты­нынан бейхабар жас осы жерде өз басы­нан сан түрлі хикаяттарды кешіре бас­тайды.
Бір қарағанда қарапайым ғана оқиға тәрізді көрінгенмен, ол өрістеп дами келе шынайы өмірге ащы шындықтың мә­селелерін туындатады. Отағасы сақа­лын белуарына түсіріп, төтенше қылық, бө­тенше мінез танытса, отбасы қайтпек? Жер сатамын деп арандап, ата-бабасының аруағының қарғысына ұшы­раса не бол­ғаны? Шынайы байлық жер қойнауын­дағы сары алтын ба, бір-бірі­мен бауырла­сып күн кешкен саф көңілді ауыл адамдары ма? Осы сериалда осынау сауалдарға қазіргі заманғы кино мен теле-нің тілінде өте қызықты да тұшымды жауап аласыз!
Бір қарағанда, яғни қазіргі өлшем­мен бағамдасақ, шағын ғана сериал Қазақ­стан құқық қорғау органдары­ның құзыры мен мәртебесін асыруда ора­сан зор насихаттық жобаның жүгін көтеріп тұрғандай әсерде қаларыңыз ақиқат. Салмақты шығарма желісі иығына погон таққан жанның жалпы қоғамнан жат­бауыр тартып бара жатқанына жана­шырлық танытады. Фильмді көре оты­рып, ары мен адалды­ғына дақ түсірмеген балғын болса да тұла бойы буырқанған жалынға, жігерге толы жас жігітке жана­шырлық білдiре түсіп, оның шынайы жү­рек лүпілін сезіп, сүй­сінесің. Барлық полиция қызметкерінің жа­нының тазалығы осы жігіттің жүре­гіндей аппақ болса етті, қиын-қыстау кезеңде немесе өмірдің сан-тараулы қилы сәттерінде әрдайым осы жандай көмек қолын созуға дайын тұрса екен, шіркін, деп тілейсің.
Аталмыш сериал – жаңа заманғы полиция қызметкерінің болмысын боя­масыз баяндайтын баллада іспетті. Өмірде ысылмаған, бірақ кіршіксіз таза көңілді, ыстық жүректі жалынды жасқа жобаның авторлары – сценарийші Бей­барыс Жұма­ниязов, режиссер Сә­бит Құрманбеков, продюсер Виктор Кли­мов бірлесе оты­рып,ізгі ниетпен ерекше сенім артуы да сондықтан болар деп тү­сінеміз. Шын­туайтына келгенде, ав­торлар тобының бұл ниеті қазіргі барша жастарға – сенім көрсету болып дәріп­телетіндей. Бұл ұғым да біздің қазіргі өмірімізге дендеп кірді, оның шешімі – әділ, бағыты – түзу. Демек, бұл – әңгі­меміздің әуел басында айтқан қайырымы мен мейірімі мол шапағы нұрлы заман есігімізден именбей кіріп келе жатыр деген сөз…

Талғат СҮЙІНБАЙ, Алматы

http://www.aikyn.kz/articles/view/39609