Кеше Қазақстан Президенті Нұрсұлтан Назарбаев Францияның еліміздегі дипломатиялық миссиясына барып, көңіл айту кітабына өз жазбасын қалдырды.
Елбасы жазбасында: «Парижде болған жантүршігерлік террорлық әрекеттер бәрімізді ауыр жағдайға душар етті. Құрбан болғандардың туған-туыстары мен жақындарына көңіл айтамын. Осындай қиын сәтте Франция халқына Қазақстан халқы атынан барынша қолдау білдіремін», делінген.
Бұдан кейін Мемлекет басшысы біздің еліміз бен Франция арасындағы сенімді әріптестікті және жоғары деңгейдегі қарым-қатынасты, сонымен қатар, таяуда өткен жұмыс сапары барысында Қазақстан тарапына көрсетілген сый-құрметті бағалай отырып, халық атынан көңіл айту үшін елшілікке арнайы келгенін айтты. Сондай-ақ, Нұрсұлтан Назарбаев биылғы жылдың 13 қарашасында Парижде зұлымдықпен жасалған лаңкестік әрекеттер салдарынан көптеген жазықсыз азаматтар қаза тапқанын атап өтті.
– Осы азалы күндері біз Франция халқымен біргеміз. Бұл ел әлемдік тарих пен мәдениет ошақтарының бірі саналады. Сондықтан, мұндай оқиға біздің бәрімізге де ауыр тиеді. Бұл наразылық пен қынжылыс тудырып қана қоймайды, барша адамзатты осындай әрекеттерге қарсы күресуге үндейді. Терроризмнің ұлты мен діні болмайды. Бұл – жалпыға ортақ қасірет. Біріккен Ұлттар Ұйымының таяуда өткен сессиясында мен «Ислам терроризмге қарсы» форумын ұйымдастыру, сондай-ақ, осынау зұлымдықпен күрестің дүниежүзілік желісін құру туралы ұсыныс айттым, – деді Нұрсұлтан Назарбаев.
Айта кетейік, Елбасы Париждегі лаңкестікке байланысты Франция Президенті Франсуа Олландқа үстіміздегі жылдың 14 қарашасында көңіл айту жеделхатын жолдаған болатын.
Жолдыбай БАЗАР,
«Егемен Қазақстан».
