Жаңа телевизиялық маусымда «Хабар» агенттігі өз көрермендерін төл телехикаяларымен қуантпақ. Ал қазір сан алуан түсірілім алаңдарында жаңа режиссерлер, сценаристер, актерлер жұмыс істеп жатыр…
«Хабар» және «Ел арна» телеарналары осы жылы бірнеше жаңа телехикаялардың тұсауын кеседі. «Ел арна» теленовеллалары жайлы бірер сөз.
«Тракторшының махаббаты» («Ел арна»)
«Тракторшының махаббаты» телехикаясының сценарийін «Махаббат және көгершіндер» мен «Қыздар» атты фильмдерге негіздей отырып, Данияр Күмісбаев пен Асқар Ұзабаев жазған. Бас продюсері – Баян Есентаева.
Басты рөл «КешYOU» тобының әншісі Кәмшат Жолдыбаева мен «Ликвидатор», «Махамбеттің қылышы» атты фильмдерден таныс Берік Айтжановқа бұйырған. Сондай-ақ ауыл әкімінің рөлін Димаш Ахметов сомдаса, оның әйелінің рөлін көпшілікке «Тамаша» арқылы танымал Гүлжан Қалыбаева сомдайды.Сценарий бойынша телехикаяның бас кейіпкері Белла жеке кәсіпкерге тұрмысқа шығуға дайындалып жатады. Алайда ол аяқ астынан есін жоғалтып, тағдырдың жазуымен ауылға келіп, сонда тракторшы жігітке ғашық болып қалады…
«Күн сақшылары» («Ел арна»)
Шытырман оқиғалы мистикалық туынды «Күн сақшылары» деп аталады. 16 сериядан тұратын туындының кейіпкерлері – өмірден өз орындарын таппай жүрген жас замандастар. Ауыл баласы Арнұрдың арманы – Алматыдай алып қалада жоғары білім алу. Алайда сынақтан сүрінген жеткіншекті тағдыр қаладағы дәмханалардың біріне әкелді. Мұнда ол Әлтемір, Томирис, Жұлдыз есімді замандастарымен танысады. Аңғал ауыл баласы мен әке дәулетімен өмір сүріп жатқан жігіттің тіл табысуы екіталай. Дегенмен оларға ортақ қасиет – өз еңбектерімен табыс тауып, дербес өмір сүруге деген ұмтылыс.
Жоба авторлары – продюсер Ахат Ибраев пен режиссер Санжар Сұлтанов елімізде бұрын-соңды болмаған заманауи, шытырман оқиғаға толы жоба жасамақ ниетте.
«Ұзақ жол» («Ел арна»)
Ауылда өскен ғашықтар Амантай мен Жанар арман қуып, Алматыға келеді. Алайда олар үшін асау ағысты қала өміріне бейімделу оңай емес. Қым-қуат тірлік иіріміне түскен жастар бір-бірінен көз жазып қалады. Сериалдың екінші бір желісіне кәсіпкерлер Мәдина мен Мұсаның тағдыры арқау болған. Олардың қылмыс пен қайғыға астасқан өмірі де шытырман оқиғалар мен қайшылықтарға толы.
Фильмнің продюсерлері – белгілі режиссер Абай Қарпықов пен оның ұлы Әлмири. «Туындының басты артықшылығы – оқиға желісі қазақстандықтардың шынайы өміріне барынша ұқсас» дейді авторлар. Әрбір көрермен кейіпкерлердің тағдырынан өз өмірімен астарлас тұстар таба алады.
Әйгерім БАҚЫТҚЫЗЫ
Айкын
