Сақшы – елдің айбыны, жер мен мемлекеттің қорғаушысы. Соңғы кезде ел қорғайтын ерлердің жағасын жыртып, шенін жұлу жаман әдетке айналып бара жатқандай.
Осыдан екі апта бұрын Оңтүстік Қазақстан облысының Шардара қаласында полицияға қол көтеріп, оны балағаттаған әйел туралы бейнежазба ғаламторда жарық көрді. Әуесқой түсірілімді мыңдаған адам тамашалаған. Оқиға былай болады.
Шардарада 1994 жылы туған қыз көлікке еш құжатсыз мініп, жол сақшыларының назарына түседі. «Темір тұлпарының» шамын жақпай жолға шыққан жүргізушіні жол сақшысы тоқтатып, жүргізуші куәлігін сұраған. Куәлігі болмаған соң ол сақшыларға қол көтереді, балағаттайды. Өз кінәсі үшін кешірім сұрамақ түгілі, әлгі өрімдей жас қыз сақшының жағасын жыртып, аузынан ақ ит кіріп, көк ит шығып боқтайды…
Екінші оқиға Түркістанда болды. Бейнежазбаға полиция өкіліне қол көтеріп, оны қылқындырған әйелді сондағы тұрғындардың бірі ұялы телефонына түсіріп алыпты. Сақшылардың көлігіне жармасып, олардың шенін жыртқан долы әйелдің сөзі мүлде түсініксіз, түсініктісі – балағат сөзі ғана…
Үшінші оқиға Астанада болған. Бұл да әуесқой түсірілім. Мұнда қыздар сақшыға емес, өздерінің құрбыларына жұдырық жұмсайды. Екі топқа бөлініп алып, төбелескен төрт қыздың «майданы» әлеуметтік желі пайдаланушылардың қызу талқысына түсті…
Осы оқиғалардан кейін көңілге көп ой келетіні анық. Қазақ «қыздың өзі үйде, қылығы түзде» демеуші ме еді. Ер-жігіттің алдынан кесіп өтпейтін, атаның сақалын сыйлайтын, азаматтың арын сақтайтын кешегі қарындастарымыздың тәрбиесі, аналарымыздың әдебі болмаушы ма еді. Ал мына қаракөз қарындастарымыздың кісі сүймейтін қылығын қалай түсінуге болады? Атпалдай азаматтың жағасына жармасып, сақшының шенін жырту – қазақ қызына ғана емес, мемлекет заңына жат қылық. Бірақ біздің үкілеп отырған аруларымыз осындай ерсі әрекетке барып отыр. Бұл тал бесікте көрген тәрбие ме, әлде өзегі бөлек ортасынан алған әдет пе?!. Қайсысы болса да, кісі сүймейтін жат қылық!
Жарас ШӨКЕ
http://jasqazaq.kz/
