Бұдан 20 жыл бұрын Ақтөбе жеріне келіп, оны тұрақты қоныс еткен оралман Шернияз Шумақай деген азамат әлі күнге дейін Қазақстанның азаматтығын ала алмай жүрген көрінеді. Бұл туралы «Жетінші арнаның» тілшісі хабарлады.Тілшінің баяндауынша, бұл кісі біздің тәуелсіздігіміздің алғашқы елең-алаңында, өткен ғасырдың басында Моңғолиядан көшіп келген екен.Тарихи отанының азат аймақ, егемен ел болғанына қатты қуанғаннан бірден аттың басын осылай қарай бұрып жүре берген ғой. Бірақ республикаға келген уақытының өзі біздің тәуелсіздігіміздің құрдасы дерлік жылға толғанша, азаматтық мәртебесі бұйырмай қойыпты.
Бір қызығы, Шернияздың туған-туыстарының бәрі әлдеқашан мұндай құжаттарға қол жеткізген екен. «Үшінші терезеге барып едім, құжаттарымның көшірмесін сұрады. Соны алмақшы болып, Ақтөбеге келсем, Әйтеке би ауданына жұмсайды, онда барсам, қайтара облыс орталығын меңзейді. Екі ортада шапқылаумен жүргенімде көп уақыт өтіп кетті. Ең қиыны, ешкім ешнәрсені кесіп айтпайды. Бұдан әрі не боларын білмеймін», дейді оралманның өзі.
Сергелдеңге түскен Шумақай құжаттары жоқтығынан тартып жүрген азаптары да аз емес екенін айтады. «Пойызға мінсем, кейде жарым жолда, жарым түнде түсіріп тастайды, жұмыс сұрап барсам, ешкім маңына жолатпайды», дейді ол.
«Апам да аң-таң, мен де аң-таң» дегендей, мұндайдың болатынын бірінші рет біліп, біз де қатты қайран қалып отырмыз.
Құрыш НҰРЫМБЕТ.
