Оңтүстік Корея азаматшасы бір жылда қазақ тілін үйреніп еркін сөйлей бастады

Әлеуметтік желіде Оңтүстік Корея азаматшасының қазақ тілінде еркін сөйлеген бейнежазбасы көптің назарын аударды. Ең қызығы — ол мемлекеттік тілді небәрі бір жыл ішінде үйреніп алған. Әйел Талдықорғанда екі жыл бойы тұрып келеді және қазақ тілін елге келгеннен бір жыл өткен соң ғана үйрене бастағанын айтқан.

«Мен Қазақстанда екі жыл тұрып жатырмын. Қазақ тілін бір жыл бұрын үйрене бастадым. Мұнда бәрі жақсы! Маған бешбармақ, лагман және палау ұнайды», — дейді бейнежазбаның кейіпкері.

Белгілі болғандай, ол — кәсіби корей тілі оқытушысы. Мүмкін, дәл осы педагогикалық тәжірибесі оған қысқа уақыт ішінде жоғары нәтижеге жетуге көмектескен болар.

Қазнет қолданушылары шетелдіктің еңбекқорлығына тәнті болды. Көптеген пікір қалдырушылар оның үлгісін Қазақстанда өмір бойы тұрып, әлі күнге дейін қазақ тілін меңгермегендерге өнеге ету керек екенін айтты.

Бұған дейін Португалиядан келген әнші де қазақ тілін үйреніп, әлеуметтік желілерде өз жетістіктерімен бөлісіп жүргені хабарланған болатын.