Қазақстандық ММА шебері Санжар Әділов Жапонияның Айти–Нагоя қалаларында өтіп жатқан XX жазғы Азия ойындарында қола жүлдеге ие болды. Ол 65 келіге дейінгі салмақта ММА-ның дәстүрлі стилі бойынша өнер көрсетті.
Бұл медальдің Қазақстан спорты үшін тарихи маңызы бар. Себебі ММА Азия ойындарының бағдарламасына алғаш рет енгізіліп отыр. Осылайша Санжар Әділов Қазақстанға Азия ойындарындағы ММА-дан алғашқы жүлдені әкелді.
Әділов ширек финалда ирандық Афшин Салими Тупгардан басым түсіп, жартылай финалға жолдама алған. Финалға шығу жолындағы жекпе-жекте ол Тәжікстан өкілі Отабек Раджабовтан жеңілді. Регламент бойынша үшінші орын үшін бөлек кездесу өткізілмейтіндіктен, қазақстандық спортшы қола жүлдегер атанды.
Санжар Әділовтің қола жүлдесі Қазақстан құрамасының Азиада-2026 ойындарындағы жетінші медалі болды.
Бұл нәтиже отандық ММА үшін де маңызды белеске айналды. Азия ойындарының тарихында алғаш рет аралас жекпе-жек бойынша жүлделер сарапқа салынып, қазақстандық спортшы сол тарихи жарыста тұңғыш жүлдегерлердің қатарына енді.
