Серік Күдебаевты Түркияда ұстап, Қазақстанға әкеле жатыр

Қазақстаннан тау арқылы қашқан болуы мүмкін деген Алматы полиция департаментінің бұрынғы басшысы Серік Күдебаевты ұсталды деген ақпарат тарады, деп хабарлайды El.kz ақпараттық агенттігі.

 Бейресми дереккөздердің мәліметі бойынша ол Түркияда қолға түскен. Енді құқық қорғау органдары Қазақстанға әкеле жатқан көрінеді. Әзірге бірде-бір ресми орган бұл ақпаратты растаған жоқ.

Айта кетейік, Алматы полиция департаментінің бұрынғы басшысы Қырғызстан арқылы Түркияға қашқаны айтылған. Осы іс бойынша жедел тергеу тобы құрылған.

Бас прокурордың орынбасары Жандос Өмірәлиев  Қырғызстан мемлекетіне жолданған сауалдың жауабы келгенін айтқан. Қырғыз тарапы Серік Күдебаев Манас әуежайы арқылы Стамбұл қаласына ұшып кеткенін анықтаған. Одан соң, ҚР Ұлттық қауіпсіздік комитеті шекара қызметінің директоры Ерлан Алдажұманов Күдебаев тау арқылы қашуы мүмкін деген болжам айтқан.