Ресей президенті Владимир Путин Қырғызстан мен Тәжікстан шекарасында соғыс қимылдарын қайта бастамау туралы екі елдің басшыларымен келісім жүргізілуі мүмкін екенін мәлімдеді, деп хабарлайды Stan.kz ақпарат агенттігі.
«Әрине, жағдай қызып тұрған кезде ортақ келісімге келу оңай емес. Соған қарамастан, менің ойымша, біз келісімге қол жеткізе аламыз. Қалай болғанда да, біз соғысты болдырмау үшін барлық шаралар қабылданады деп уәделестік», — деді Путин.
Қол жеткізілген уағдаластықтар арасында Ресей басшысы екі жақтан босқындарды қайтару шараларын атап өтті. Владимир Путин Қырғызстан мен Тәжікстан тарапы жағдайды реттеу үшін Ресейге талаптарын жеткізетінін айтты. Ресейлік тарап Қырғызстан мен Тәжікстанның «ұсыныстарын бағалап қана қоймай», «шешім шығаруға көмектесетін» мұрағаттық құжаттарды да көтеруге тырысатынын атап өтті.
«Біз қандай да бір делдал рөлін атқармаймыз, алайда, екі тараптан да тиісті құжаттарды алып, осы мәселені шешу бойынша ұсыныстарын саралаймыз деп шештік. Менің айтайын дегенім, Мәскеуде одақтық республикалардың шекаралары туралы кейде одақтық республикалардың өзінде де жоқ ақпарат болады», — деді Владимир Путин.
Қырғызстан мен Тәжікстан шекарасында ауқымды қақтығыс 16 қыркүйек күні таңертең басталды. Тараптар бір-бірін атқылады деп айыптады. Екі елдің әскерилері арасындағы кескілескен ұрыс шекараның бүкіл дерлік периметрі бойынша күні бойы жалғасты. Қараңғы түскенде ғана атысты тоқтатуға қол жеткізілді.
25 қыркүйекте Қырғызстан мен Тәжікстан өкілдері жағдайды реттеу туралы хаттамаға қол қойды, онда олар шекарадағы қақтығыстарды тоқтату және мемлекеттік шекараны делимитациялау және демаркациялау үдерісін жеделдету туралы келісті. Сондай-ақ, құжатқа сәйкес, тараптар қақтығыстар жиі болатын жерлерде тараптардың әрқайсысына төрт шекаралық нүкте қоюға келісті.
